Hajiji (poindikau koonom, wanan) miampai montiri kabinet om monunurat pulitik wagu katalib ababayan ‘angkat sumpah’ (tuminaru).
KOTA KINABALU: Boyoon Montiri (CM), Datuk Seri Haji Hajiji Haji Noor minonuhu’ di 18 Monunurat Pulitik di wagu kosili do papatantu’ kointalangan karait inggisaman om katatapan koporintaan pogun korikot kumaa nayatan siriba’.
“Karaja’ songulun monunurat pulitik oponsol kopio id sistem pomorintaan tokou. Pokionuon ku oinsanan monunurat pulitik monguhup koporintaan om montiri sompoopori, kosuul no id kopotonuan katatapan ngaawi’ koporintaan.
“Bobos oponsol, id kapatahakan kointalangan karait Sondikoton Sabah Maju Jaya (SMJ) 2.0 i kotimpuun do toun tiso’,” ka diiso id ramai tuminaru 18 monunurat pulitik id Menara Kinabalu do hiti, di baino’.
Pinoposusui kawagu isio di maso Pomilian Agayo Pogun (PRN) di katatalib, kogumuan rayat i norubaan dau amu’ koilo inggisaman om ponguhupan i pinosodia’ do koporintaan, sundung pia do pinokitanan miampai poinpuli id koinsanai platform media.
Minoboros isio, haal miagal kopongokunan koporintaan pogun kumaa ‘Unified Examination Certificate (UEC)’ om kaantakan do 39 mongingigit dilo’ gina’an do sikulasip koporintaan, amu’ noilaand o mogigiyon Sina’.
“Nokotigowo oku soira’ ogumu’ id mogigiyon Sina i amu’ nokoilo nunu i nowonsoi do koporintaan pogun sundung haro ogumu’ ponguhupan di pinatahak tokou kumaa sikul ngaawi’ Sina om t inan kougamaan okon Islam.
“Muhot-uhot oku nogi’ nokuro yolo’ tu’ amu’ nokoilo ponguhupan i amu’ po insan kaantakai id susuyan kahandaman Sabah pogulu diti. Koporintaan pogun (id siriba’ GRS – Gabungan Rakyat Sabah) pinopoobi’ agayo soginumu’ RM1.3 bilion montok balajaran om koburuon ‘modal insan’,” ka disio.
Ponguhupan suai kaampai komputer riba piri, pambayaran yuran kosuangon univositi do insan no, subsidi montok susumikul univositi i potuu id suang pogun toi id Semenanjung Malaysia i muli’ kumaa kampung onotk timpu suti’, ponguhupan montok calon SPM tikid toun, 40 unit Walai Mesra SMJ i rinuhangan kuminaa 50 unit montok tikid watas Lintuhun Undangan Pogun (DUN), om ogumu’ po montok mongingkawas rontob koposion rayat.
“Oinsanna diti amu’ po insan kowonsoi pogulu diti. Mantad dilo’, pokionuon ku monunurat pulitik papapamanu tonggungan diolo’ id kapatahakan kointalangan diti kumaa rayat id kinoiyonon.
“Manu tokou do rayat kaanu kointalangan kohunung karait inggisaman i nanu do koporintaan pogun mooi do amu yolo’ monondos dati’ do manahak nopo batos kusung,” ka disio.
Boyoon Montiri minoboros do koporintaan pogun nga’ masaan nogi monimbang upalai mantad Puru Lintuhun Undangan Pogun (ADUN) pembangkang montok ponguhupan id upa’ kopoobian ponguludan upis.
“Sabaagi koporintaan di aadang, monimbang tokou do haal diti, tumanud do nunu ka di Montiri Kousinan,” ka disio.
Minamason nogi’ i Hajiji di monunurat pulitik do amu’ momoguno poinsala’ karaja montok momogusa’ koundaran sondiri.
“Manu oku monunurat pulitik popoindalan karaja’ di pinoowitan miampai poinsonong om monguhup do montiri sompoopori nogi’ koporintaan.
“Amu’ oku bakangon do maganu laang kohondot diolo’ i oilaan mongumpadan kotumbayaan di pinatahakan,” ka diiso, i minoboros do mositi’ diolo’ kumaraja’ sabaagi iso’ tiim montok papatantu’ koinsanai katatapan koporintaan koindalan do poinlantoi.
Monunurat pulitik wagu id Koupisan Boyoon Montiri nopo nga’ i Azrul Ibrahim (Luguan Monunurat Pulitik), Datuk Effendi Mohamed Sunoh, Datuk Mazlan @ Joehari Manan, Datuk Arthur Sen, Datuk Norazlinah Arif, Datuk Lahirul Latigu, Noorazmahirah Noorzain om i Mohd. Isquzawan Israq Arsit.
Monunurat pulitik suai nopo nga’ ii Dr. Bonaventure Boniface (Komontirian Karaja Agayo om Utiliti), Johari @ Joe Suhaimin (Komontirian Kousinan), Carlyle Lajimin (Komontirian Koburuon Pomorunan, Pongindopuan om Padsakaian), Abd. Wahid Abd. Razak (Komontirian Koporintaan Koiyonon om Pomuwalaian), Justinus Jalang (Komontirian Balajaran, Sains, Tiknologi om Inovasi), M. Aziriansyah Ali (Komontirian Koburuon Komulakan, Sipoot om Ikonomi Kreatif), Sabili Ahunang (Komontirian Koburuon Labus Kakadayan), Marius Masain (Komontirian Koonduan, Kolidasan om Kasasangan Mogigiyon), Datuk Raimie Unggi (Komontirian Ponombuluyan, Koubasanan om Sandad Posorili) om i Herbert Roger (Komontirian Pomutanaman, Ponginsadaan om Pomorunan Akanon).
