Jamawi (koduo, wanan) monongkirumo miampai pipiro Kapitan Sina’.
TENOM: Montiri Pomutanaman, Ponginsadaan om Pomorunan Akanon, Datuk Jamawi Jaafar pinoposiwat timpu ruminuba’ mogigiyon nokoiyonon om tongo’ mongindapu’ okoro’ kinotuan id Tomu Kakadayan Tenom, di konihab.
Puru Lintuhun Undangan Pogun (ADUN) Melalap dilo’ minindahu’ ruminuba’ mogigiyon nongokomoi sabaagi tanda’ pongunsikohan soira’ nakalantoi Pomilian Agayo Pogun Lintuhun Undangan (PRU DU) Sabah ko-17 di kawawagu diti.
Jamawi (tanga’) miampai di Zainatunnisa guminambar pongingitanan miampai Kapitan Sina om tinimungan mogigiyon Sina i nokotindapou.
“Iti nopo nga’ i kumoinduo ku minooi ruba’ tongo’ mononokodung ku. Mongunsikou oku kumaa oinsanan rayat DUN Melalap i minonokodung doho’,” ka disio soira’ rinubaan.
Id kinotombuluyand ilo’, i Jamawi tinanud di sawo dau, Datin Zainatunnisa Ibrahim nga’ pinapaharo nogi’ pinirubaan oruhai miampai di Kapitan Sina’ id Kadai Kupi Soon Heng montok mokinongou pomusarahan om nogi’ kobolingkahangan nokoiyonon i nulingad do mogigiyon Sina’.
Jamawi om Zainatunnisa (tanga’) guminambar pongingitanan miampai tutumanud Klinik Sepak Takraw Akademi ASTAKA Tenom.
Naamot dilo’, id ababayan sopisuai, pinopoimagon nogi’ isio ramai pinomupusan Klinik Sepak Takraw Akademi ASTAKA Tenom id Lintuhun Datuk Seri Panglima Antanom suai ko’ minintong pinisahapan final Liga Super Tenom Trofi Jamawi Jaafar (JJ) i pinaanjur do JJ Football Club miampai kouhupan MRZ Production, Berita Sukan Tempatan om Karnival Melalap Anak Muda i nakapanau id Kompleks Sipoot Tenom.
PRU DU Sabah ko-17, Jamawi nakaanu majoriti 525 undi id pininsingumbalan kumoinduo disio monokisolod timpohon DUN Melalap.
Jamawi (tanga’) tuminabi’ dilo tongo’ mamamain om tinanud di Upisor Watas Tenom, Alexander Liew.
Ka disio, minamagampot kinalantaion dilo’ okon ko’ haal di asanang, lolobi po potoguang turu’ calon suai.
Komoyon disio kinalantaion dau sabaagi asil karaja’ agaras om tonggungan koinsanai pakakaraja’ parti i mininggisom papatantu’ kalantaion calon.
Jamawi pinopowonsoi pomorisaan kolidasan om poingintong i Zainatunnisa (gibang) om ilo suai.
Nokotindapou nogi’ Luguan Watas DUN Melalap, Tusib Tulas; Kaptian Chong Neng Choon, Kapitan Chung Kiam Fui, Kapitan Lai Foon Han om i Kapitan Michael Chu Siew Kok.
