Jamawi (tanga’) miampai sawo, Datin Zainatunnisa Ibrahim guminambar pongingitanan miampai oinsanan i nokotindapou doid Kabun kinotuan id Bukit Layang-Layang, Ulu Paal dilo’.
TENOM: Kabun kinotuan id Bukit Layang-Layang, Ulu Paal, kikosiwatan silihon ‘model’ (ombitanan) koburuon pomutanaman tana’ tidong kiwaya’ akawas id Sabah maya’ piuhupan kosudong id pialatan mongungusaha’, mogigiyon nokoiyonon om agensi koporintaan, ka di Montiri Pomutanaman, Ponginsadaan om Pomorunan Akanon, Datuk Jamawi Jaafar.
Minoboros isio dilo’ onotk pinopowonsoi kotombuluyan karaja’ kuminaa kinoiyonon dilo’ miampai Koupisan Pomutanaman Sabah pogulu minonilombus ababayan miampai Koupisan Pomuwoigan om Poluyungan (JPS) id Kampung Binaie, di tadau baino.
Ka di Jamawi, koiyonon kiginayo lobi 20 hektar dilo’ minomoguno pomogunaan bobos okuri’ bahan kimia om poposuul do bahan organik id kopolobusan kinotuan miagal kobis, bunga kubis, bintorung, lusung om lado.
Jamawi miampai sawo Datin Zainatunnisa Ibrahim di maso id Kabun kinotuan id Bukit Layang-Layang.
“Koiyonon diti wagu turidongo’ di tolu toun nakatalib om mongungusaha’ dilo’ minggisom mongingkuri’ pomogunaan pamawanit om baja kimia. Momoguno yolo’ ogumu’ bahan organik miagal taik manuk. Iti nopo nga’ ponginsomokan i kopiongoi di sondikoton pomutanaman ogirot i maan tokou turidongo’ id Sabah,” ka disio.
Jamawi pinopoilo nogi’ do Koupisan Pomutanaman minonguhup iso’ hektar koiyonon id kabund ilo’, naamot i nopo lobi nga’ pinoburu’ di mongungusaha’ miampai minoniwa’ tana’ pasanganu mogigiyon kampung id rontob RM100 gisom RM150 sonhektar sombulan.
“I nopo kopoondos, 100 pihatus pakakaraja’ id kabun diti nopo nga’ mogigiyon nokoiyonon i karamit gaji bobos osiriba’ RM1,700 kaampai kopoopuan KWSP. Iti no ombitanan piuhupan i orohian tokou kokito – papaapu’, mongungusaha’ om mogigiyon nokoiyonon koburu’ oinsanan,” ka disio pinoposotol.
Isio Puru Lintuhun Undangan Pogun (ADUN) Melalap minoboros, pananaman tana’ tidong id koiyonon dilo’ nga’ kosili nogi’ do sumpili’ kumaa intodonon kopolobusan kinotuan tana’ tidong id Kundasang, potilombus dino kapanahak lobi kogumu’ sumpilion kkumaa moomoguno om monginggirot piromutan pangaba’ takanon id Sabah.
“Nung pogulu diti tumalahan tokou no do Kundasang, noondo Layang-Layang kaanu silihon longkod kopolobusan wagu. Moomoguno do noondo kiharo pilion suai montok maganu kinotuan tana’ tidong di osonong,” ka disio.
Jamawi (koduo, gibang) maso mintong peta kabun kinotuan dilo’ miampai di Leonard (tanga’) om ilo suai.
Jamawi pinopohimagon po nogi’ do komontirian disio nakaramit pipiro upalai montok monginsonong rontob ralan pomutanaman nogi’ monuridong walai lungungon rasam id koiyonon dilo’.
“Walai lungungon rasam oponsol kopio montok tanom miagal tomato i osoding do koyuon tongus au atantu’. Ilo’ kouhup mongingkuri’ tomporuruol, manamong kopongumangan do momimiraag om papatantu’ asil di lobi kosonong,” ka disio pinopointalang.
Kalansanan nogi’ disio koburuon id koiyonon dilo’ aanu monilombus om monginggirot maya’ sokodung Koupisan Pomutanaman nogi’ kogompitan aparagat mongungusaha’ nokoiyonon.
“Manu tokou koiyonon diti koburu sabaagi zon pomutanaman kikohosilon akawas. Koupisan Pomutanaman tumilombus miontong sinonong maya’ kopogonuan sampel mooi do asild i kalabus koponumboyo’ di rontob MRL i nakatatap,” ka disio kawagu.
Katalib kotombuluyan id Bukit Layang-Layang, i Jamawi minonilombus pinongintongan kuminaa kabun pomogompian manuk.
Nokotindapou nogi’ i Monunurat Pointatap Komontirian, Datuk Leonard Stehpen Poyong om Potunud Pomutanan Sabah, Datuk Jifrin Hj. Mohamad.
