Hajiji (koduo, wanan) miampai di Chin (gibang), Mohamed Nazim (koduo, gibang), Soh (tanga’) om Armizan (wanan) id pinibabarasan di songkosodop.
KOTA KINABALU: Boyoon Montiri, Datuk Seri Haji Hajiji Haji Noor minokianu Sabah Law Society (SLS) popotoguang kointalangan ‘input’ montok monginggirot koponugatan Sabah kohondot geran pinotomod 40 pihatus mantad koporintaan Pisompuruan.
Minoboros isio, input SLS, i potoguangon kumaa Koupisan Luyar Agayo Pogun om Komontirian Kousinan Pogun, oponsol kopio montok monginggirot rangka karaja’ i nosili nimpohon pibabarasan po’ompus Sabah miampai koporintaan Pisompuruan.
“Id pinirubaan miampai SLS< minokinongou oku pomusarahan om atag diolo’. Pinokianu ku yolo’ do poposodia’ input osorisid om popotoguang dilo’ kumaa Luyar Agayo Pogun om Komontirian Kousinan Pogun montok tumilombus monginggirot koponugatan tokou,” ka disio katalib pinirubaan miampai Presiden SLS Datuk Mohamed Nazim Maduarin om bagas presiden Datuk Roger Chin id kinoiyonon disio di songkosodop.
Kopokionuan Boyoon Montiri dilo’ nopo nga’ nosusuhut di kootusan Kuut Akawas di ko 17tw Kohopod i minonuhu’ koporintaan Pisompuruan papaharo pirundingan miampai koporintaan pogun id timpu 90 tadau kohondot geran koundangan dilo’.
Suai ko’ geran pinotomod 40 pihatus, Boyoon Montiri po nogi’ Ponorikohon Gabungan Rakyat Sabah (GRS) mokianu SLS sumili somboogian mantad tiim i monuridong kerangka Dana Kopoopuan Timpu Dumontol Tanak Sabah (Sabah Sovereign Wealth Fund – SSWF) kaampai koposodiaan draf enakmen dilo’.
Ponuridongan dana kumoiso’ SSWF diti, wookon ‘ikrar teras’ id manifesto pomilian agayo GRS i pinoimpuun di ko 17tw Kohopod om Iso’, kituduan mongingkawas asil toun-toun pogun kumaa RM10 bilion dumontol 2030.
Modal ponimpuunan SSWF maan onuo’ mantad wookon rizab pogun Sabah montok mamajamin ginirot kousinan timpu anaru montok sinakagon dumontol.
Iso’ pihotusan pointatap mantad geran pinotomod 40 pihatus Sabah mantad Putrajaya nga’ posuangon nogi’ id dana dilo’ do tikid toun.
Boyoon Montiri minoboros, suai ko’ mobi’ koporintaan, tiim SSWF nga’ kopohompit nogi’ tinimungan abaal om abaal id kaganaan kopoopuan, kousinan nogi’ koundangan.
Nokotindapou nogi’ i Montiri Pidagangan Suang Pogun om Kos Balanja Masi om po nogi’ Kumoduo Monunurat Agayo GRS, Datuk Armizan Mohd. Ali om Luyar Agayo Pogun, Datuk Brenndon Keith Soh.
