Fadhlina (tanga’, toguang) guminambar pongingitanan ontok ‘turun padang’ minooi intong posodiaan Poporisaan SPM id SMK Keningau.
KENINGAU: Komontirian Balajaran Malaysia (KPM) sumosodia’ monoguang koyuon tawan montok papatantu’ lobi 413,000 calon poinatatap koindikau poporisaan Setifikit Balajaran Malaysia (SPM).
Montiri Balajaran, Fadhlina Sidek minoboros po’ompus poporisaan SPM toun 2025 kapanau, bohogian disio sumosodia’ miampai karalano’ om laang posodiaan poinpatut kopohompit piuhupan miampai Kotinanan Ponguludan Kadaat Negara (NADMA), Tinimungan Susumangod Malaysia (ATM), Koupisan Meteorologi Malaysia (MetMalyasia), Koupisan Bomba om Manampasi (JBP), Tinimungan Koumoligan Awam Malaysia (APMM, Koupisan Kotundunan Mogigiyon (JKM) om Komontirian Kolidasan Malaysia (KKM).
“Haro kaantaban okooro’ id pipiro pogun tu’ nokoluyud, nga’ alhamdulillah oinsanan posodiaan poindalan miampai osonong miampai kinosodia’on di oinsanan kotinanan di poinggompit.
“Mantad dilo’ montok Sabah, monongkounsikou oku kumaa JPN, PPD om sikul kosuul no i nakapatantu’ posodiaan sundung pia do haro kopikiikiraan rasam asapou, liyud om sopiagal dilo’.
“Posodiaan dilo’ nokoindalan tokou no do lobi kosopung montok monoguang nunu-nunu kopikiikiraan kaamapi Ops Payung i pinogura’ tokou id pototongkod pomogunon,” ka disio kumaa media id sesi ‘turun padang’ miampai Potunud Balajaran Sabah, Datuk Raisin Saidin, Upisor Balajaran Watas (PPD) om Molohingon Sikul montok minintong posodiaan poporisaan montok karatas kumoiso’ Bahasa Melayu id SMK Keningau, di tadau Koduo.
Minonongkounsikou nogi’ isio kumaa oinsanan bohogian i nokohompit om minamason kounsikahan kaanu kalantaion kumaa koinsanai calon SPM, miampai pinoposotol do KPM tumilombus monokodung om papatantu’ poporisaan koindalan oturundus.
“Mamason oku ‘selamat maju jaya’ kumaa oinsanan tangaanak i monoguang SPM do tadau baino’. Kalansanan kalantaion pointonggoi tangaanak ngaawi’ om papatantu’ oinsanan posodiaan dilo’ kapanau miampai osonong.
“Id nayatan KPM tumilombus do monokodung om papatantu’ koinsanai posodiaan tanganaak kosuul no monoguang koyuon tawan potuu toi ko’ kadaat liyud, tangaanak pointatap koponolimbus poporisaan miagal di nakatantu’ om nokoulud,” ka disio.
Naamot dilo’, i Raisin soira’ rinubaan media pinopoilo, JPN Sabah opoduli’ di koumoligan om kotundunan calon nogi’ pakakaraja’ poporisaan id koponoguangan nunu-nunu kopikiikiraan kadaat om kopogkorolihan tomporuruol mogkoroliu Influenza-Like Illness (ILI).
Minongomi karait posodiaan JPN Sabah, ka di Raisin bohogian dau nokopogura’ Operasi Payung nung aantakan kadaat liyud montok monguhup calon om pakakaraja’ poporisaan di ohompitan.
“Calon poiyonon id asrama sikul toi longkod poundolihan naamot om ponguhupan logistik maan patahako’ kumaa calon om pakakaraja’ poporisaan i oumpadanan do liyud.
“Montok papatantu’ kotoronongon pomusarahan om kopurimanan calon poporisaan, JPN Sabah poposodia’ nogi’ surupukaraja’ sokodung ‘psikososial,” ka disio.
Daamot dilo’, minamason isio koinsanai calon poporisaan do popoilo kumaa bohogian sikul toi Upis Balajaran Watas (PPD) miampai osikap nung amu’ no kotingan id longkod poporisaan di nakatantu’ toi nombo-nombo longkod poporisaan dodoros mantad no do kadaat.
“Calon kaanu momoromut numbur pisuk gerakan poporisaan di pinosodia’ id longkod upis JPN Sabah 088-304099 / 088-221132. JPN Sabah pointotopot montok popowonsoi di bobos osonong montok papatantu’ poporisaan SPM Toun 2025 aanu popoindalan miampai oturundus om oulud,” ka disio kawagu.
Id Sabah, ginumu’ calon SPM nokoingkawas kuminaa 37,038 tulun naamot 232 tulun nopo nga’ Calon Kikopomogunaan Pinotomod (CBK) i mindikau poporisaan id 320 longkod poporisaan pototongkop Sabah kopohompit soginumu’ 4,214 pakakaraja’ poporisaan kaampai pengawas poporisaan id nayatan ‘sukarelawan’.
Poporisan poinsurat SPM Toun 2025 i nokotimpuun di konihab gisom ko 23tw Kohopod om Duo obontol nga’ kopohompit nogi’ 81 mato balajaran kapaamapi 113 karatas poporisaan i onuon do calon id pogun diti.
