Dr. Joachim (gibang) monongkirumo miampai mogigiyon kampung mukim Malinsau ontok kinotombuluyan dilo’. – Foto Sabah Media Zainal Zamzuri.
KUNDASANG: Mongigit limo penggal timpohon Lintuhun Undangan Pogun (DUN) Kundasang, Datuk Seri Dr. Joachim Gunsalam otumbayaan sokodung kumaa Gabungan Rakyat Sabah (GRS) id Longkod Watas Mongundi (PDM) Malinsau kotilombus ogirot dumontol Pomilian Agayo Pogun Lintuhun Undangan (PRU DU) Sabah ko-17.
Calon GRS dilo’ minoboros kotumbayaan nokomoi mantad no kinapapanahan karaja’ kukumaraja i ouli’ om piromutan oronit disio miampai mogigiyon nokoiyonon do solinaid diti.
Dr. Joachim rinubaan kru Sabah Media ontok pinapaharo kotombuluian doid PDM Malinsau di tadau Kaapat (ko 20tw Kohopod om Iso’), i kopohompit walu’ kampung ilo’ nopo nga’ Kg Nasakot, Kg Sumbilingon, Kg Linapasan, Kg Mantub, Kg Mampakot, Kg Tanid, Kg Mokodou om Kg Kopuakan.
Ka disio, kotombuluyan kumaa PDM oponsol montok papatantu’ markas, pakakaraja’ nayatan siriba’ om piromutan mongungundi’ id koyuon di poinsosodia’ nogi’ karati pason kempen GRS.
“Gisom noondo diti, tuminombului yahai iso’ PDM ilo’ nopo nga’ Malinsau. Id apat tadau ‘turun padang’, ounsikou yahai di sokodung naramit om otumbayaan kopio kaanu popowonsoi di bobos osonong,” ka disio.
Pinointalang disio tikid kampung kiharo pipiro markas okoro’ i mongulud pialatan 18 gisom 100 mongungundi’ tumanud di ginumu’ mogigiyon.
“Tingkananon dahai nopo nga’ papatantu’ tikid piromutan mongungundi’ orubaan. Kogumuan diolo’ notutunan ku no tu’ asaru’ oku ruminikot impiipiro pogulu diti. Kotombuluyan diti baino’ lobi kumaa monginggirot sokodung,” ka disio.
Dr. Joachim minoboros PDM Malinsau kiharo pialatan 1,900 gisom 2,000 mongungundi’, om sundung koiyonon dilo’ id siriba’ nogi’ ampawong calon Bebas, GRS kakal otumbayaan kosigampot kootusan osonong.
“Nung kaanu tokou kikiro 50 pihatus do hiti om 60 pihatus id PDM suai, kosiwatan tokou pointatap do anawau,” ka disio.
Minongomi naangayan GRS id koiyonon Malinsau om pososorili’ Kundasang, ka di Joachim koburuon infrastruktur lolobi no talun-alun kakal nosili tingkananon.
“Kobolingkahangan bobos oponsol do hiti nopo nga’ ralan. Nokowonsoi tokou ogumu’ pinonginsonongan kaampai ralan pomutanaman om kopongundaran kogogonopan di po’ompus,” ka disio.
Minoboros isio siktor balajaran om kolidasan nga’ nokopokito nogi’ kinomogoton sundung kakal ogumu’ liwang nuru’ insonongan.
“Ogumu’ sikul nongoundar sundung amu’ pia noinsanangan poinponu’. Id sunduk kolidasan, kolinik id Tenggaran, Timbua om pipiro kampung suai do noondo haro no dokutur. Nga’ kakal momoguno koponginsonongan pomoruhang om ponuridongan kolinik wagu,” ka disio pinopointalang.
Ka disio, haro atag monginsonong kolinik tina’ om tanak di poinharo mantad kumaa kolinik kolidasan nogi monuridong songinan kolinik wagu noupalai, suai ko’ mongundar om monginsonong talun-alun id pipiro koiyonon di kakal kikobolingkahangan.
Dr. Joachim pinoposotol piuhupan koporintaan pogun om Pisompuruan oponsol kopio montok papatantu’ koburuon aanu popoindalan miampai kiwaya’, potilombus dino kapanahak koundaran mitilombus kumaa mogigiyon.
Minoboros isio, PRU DU ko-17 nopo nga’ oponsol montok papatantu’ kotilombuson katatapan om koburuon i noowit do GRS id timpu limo toun nakatalib.
“GRS nokopogowit ogumu’ kinosimbanon agayo mantad koponguludan asil pogun, kinopoingkawasan rizab kousinan, ponguhupan walai SMJ gisom no koburuon modal insan. Rayat nokokito no do asil dilo’.
“Undi GRS kirati monilombus waya’ koburuon diti,” ka di calon numbur 10 dilo’. – Sabah Media
