Hajiji miampai calon ngaawi’, lansanon om mononokodung GRS.
KOTA KINABALU: Gabungan Rakyat Sabah (GRS) tumanding id 55 timpohon doid Pomilian Agayo Ginumuan Lintuhun Undangan diti baino’, miampai poposotol koponginwoguan maya’ 35 pihtus calun wuros wagu sabaagi sunduk wagu piomungan dilo’.
Boyoon Montiri, po nogi’ Ponorikohon GRS, Datuk Seri Haji Hajiji Haji Noor minoboros, calun ngaawi GRS nopo nga’ piomungan diolo’ i kinawawaya’an nogi’ kinoruhang di tongo’ mulok.
“Soginumu 35 pihatus nopo nga’ wuros wagu, sabaagi ponginsomokan ogoris montok mogowit pomusarahan wagu om ginoris wagu kumaa rayat Sabah. Otumbayaan oku kaanu yolo’ monokisahap om kalantoi id pomilian agayo diti,” ka disio ontok rinubaan magaganu habar katalib Ramai Kinapahabaran Calon GRS id Longkod Konvensyen Sompomogunan Sabah (SICC) do hiti di tadau baino’.
Hajiji i momusus nogi timpohon N12 Sulaman minoboros, apat no koioyonon i pahabaron do suab om tingkananon GRS noondo nopo nga’ tumanding id koinsanai 55 timpohon amu’ mogintong parti komponen.
“Komoyon tokou GRS sabaagi iso’ tinan. Kalansanan ku kinapahabaran calon tadau diti koposindak po do sunduan mononokodung GRS om parti komponen montok kumaraja’ agaras papatantu’ kalantaion tongo’ calon tokou,” ka disio pinoposotol.
Pinokianu disio oinsanan mononokodung do popiiso’ ginoris, papatantu’ kalantaion GRS om pinoposotol do sokodng kumaa piomungan diti nopo nga’ sokodung kumaa koburuon om komogoton pogun.
Id boboroson disio, pinosotol di Hajiji do koporintaan pogun id siriba’ pomorintaan GRS nokototos mininggisom montok minogowit kosimbanon om koburuon kumaa rayat Sabah.
“Yoho’ miampai oinsanan rayat om koporintaan minonotos mininggisom montok minogowit kosimbanon om komogoton. Sundung okon koinsanai kalantaion naanu pinopokito, tikid laang di minaan onuo’ tumanud undang-undang om poinponu’ tinonggungan,” ka disio.
Minoboros isio, poompus limo toun pomorintaan GRS, ikonomi pogun notonduli’, kopoopuan nokoingkawas om kosiwatan pakarajaan wagu naanu minongimbulai.
“Taman-taman pomorunan miagal KKIP om SOGIP noondo diti amu’ nodii katampung kopokionuan akawas.
“Mantad dilo’, koporintaan kiatag monuridong tolu taman pomorunan wagu id Beaufort-Kimanis, Kota Belud-Kota Marudu, om Kudat: Kudat i kosili longkod pomorunan Ekonomi Obulou montok mongunsub kosunion id ponongkabaatan Sabah,” ka disio pinopointalang.
Pinopoilo nogi’ isio pipiro pibatosan oponsol miampai PETRONAS, SMJ Energy om komponi nokoiyonon id kopoburuan pomorunan tumau om gas i kapanahak koundaran agayo kumaa pogun.
Id balajaran, koporintaan pinopoobi’ RM1.02 bilion poompus limo toun montok sikulasip om tabung balajaran, nakapanahak koundaran kumaa lob 480,000 tanak Sabah.
Hajiji pinoposostol kotundunan tulun mosikin om mosikin ‘tegar’ maya’ ababayan Rumah Mesra SMJ, miampai 7,482 unit pinolulus om 5,322 unit nopongo do iyononon, suai ko’ ponguhupan tusin tunui RM300 sombulan kumaa 100,000 mamaramit.
Mantad sunduk kogogonopan, koporintaan minomoruhang Loji Pongubatan Waig mantad 85 kuminaa 91 tinan, kaampai projik monginsonong LRA Telibong II, Beluran, Kanibongan om Kasigui UWSS, kigatang RM1.2 bilion. Wokok Waig Cinta Mataa id Tawau kigatang RM300 riong pikikiro opongo 2026.
Id siktor ginoris, Sabah Electricity pinopointutun ‘Battery Energy Storage System (BESS)’ montok koiyonon Tisan Kosilahon. Kounsol Ginoris Pogun Sabah pinopolulus 11 projik janakuasa kiginoris 1,219 megawat, naamot Projik Empangan Hidroelektrik Ulu Padas miampai kos RM3.048 bilion pikikiro kopongimbulai 187.5 megawat dumontol 2029.
Koporintaan pogun nga’ pinopogoris po nogi’ koburuon talun-aluln maya’ Projik Pan Borneo Sabah om koponginsonongan ralan kampung, miampai kopoopian RM4.89 bilion.
Hajiji pinoposotol inggisaman ponondulian sandad posorili’ tinilombus, miampai sondikoton 30 pihatus watas pogun kosili ‘Totally Protected Areas (TPA)’ om 1.015 riong hektar sabaagi ‘Marine Protected Areas (MPA)’, suai ko’ mononduli’ gompi’ lobi 1,000 hektar koiyonon otomou.
“Koinsanai inggisaman diti nopo montok papatantu’ Sabah kotilombus komogot, ‘progresif’, kisinangal om ounsikou,” ka di Hajiji.
Pinosotol disio calon ngaawi GRS nopo nga’ mantad nayatan diolo’ i poinsodia’ popoburu’ om papatahak surupukaraja kumaa rayat.
“Miampai kinapahabaran diti, koporonit tokou saf kopomuruanan, monginggirot sunduan kopoburuan om papatantu’ kalantaion. Pilion tokou GRS, undion tokou GRS, palantaion tokou GRS… insya-Allah koguli’ tokou momurua koporintaan pogun Sabah,” ka disio pinoposotol.
NULUDAN CALON GRS (55 KERUSI DUN)
N01 Banggi – Datuk Mohamad Mohamarin
N02 Bengkoka – Dr. Samuil Mopun
N03 Pitas – Datuk Seri Ruddy Awah
N04 Tanjong Kapor – Datuk Ben Chong Chen Bin
N05 Matunggong – Datuk Julita Majungki
N06 Bandau – Datuk Redonah Bahanda
N07 Tandek – Datuk Hendrus Anding
N08 Pintasan – Tan Sri Pandikar Amin Mulia
N09 Tempasuk – Datuk Mohd. Arsad Bistari
N10 Usukan – Datuk Japlin Akim
N11 Kadamaian – Mudezam Muyau
N12 Sulaman – Datuk Seri Hajiji Noor
N13 Pantai Dalit – Datuk Jasnih Daya
N14 Tamparuli – amu’ po nakapahabar
N15 Kiulu – Datuk Joniston Bangkuai
N16 Karambunai – Datuk Arshad Idris
N17 Darau – Datuk Mohd. Razali Razi
N24 Tanjung Keramat – Shah Alfie Yahya
N26 Moyog – Joeynwood Bansin
N27 Limbahau – Datuk Juil Nuatim
N28 Kawang – Datuk Gulam Haidar Khan Bahadar
N29 Pantai Manis – Datuk Pg. Saifuddin Pg. Tahir Petra
N30 Bongawan – Tan Sri Anifah Aman
N31 Membakut – Datuk Dr. Mohd. Ariffin Mohd. Arif
N32 Klias – Datuk Isnin Aliasnih
N33 Kuala Penyu – Datuk Limus Jury
N34 Lumadan – Datuk Ruslan Muharam
N36 Kundasang – Datuk Dr. Joachim Gunsalam
N37 Karanaan – Datuk Seri Masidi Manjun
N38 Paginatan – Datuk Abidin Madingkir
N39 Tambunan – Datuk Victor Paut
N40 Bingkor – amu’ po nakapahabar
N41 Liawan – Datuk Annuar Ayub Aman
N43 Kemabong – Datuk Rubin Balang
N44 Tulid – amu’ po nakapahabar
N45 Sook – Datuk Ellron Angin
N46 Nabawan – Datuk Abdul Ghani Yasin
N47 Telupid – Datuk Jonybone J. Kurum
N48 Sugut – Datuk James Ratib
N49 Labuk – Datuk Samad Jamri
N51 Sungai Manila – Hazem Mubarak Musa
N52 Sungai Sibuga – Datuk Amirshah Yaakub
N53 Sekong – Puan Sri Diana Diego @ Yusrina Sufiana
N57 Kuamut – Datuk Masiung Banah
N58 Lamag – Johainizamshah Johari
N59 Sukau – Datuk Juhari Janan
N60 Tungku – Datuk Abdul Hakim Gulam Hassan
N62 Silam – Datuk Mizma Apehdullah
N63 Kunak – Datuk Norazlinah Arif
N65 Senallang – Datuk Marunda KK. Ampong
N66 Bugaya – Noordin Abdul Hussin
N67 Balung – Syed Ahmad Syed Abas
N68 Apas – Datuk Nizam Abu Bakar Titingan
N70 Kukusan – amu’ po nakapahabar
N71 Tanjung Batu – Dr. Andi Md. Shamsurezal
