Haji Hajiji Haji Noor
KOTA KINABALU: Boyoon Montiri, Datuk Seri Haji Hajiji Haji Noor pinoposotol do kootusan duo bagas lansanon Parti Gagasan Rakyat Sabah (Gagasan Rakyat) i noondo diti nosili calon Parti Keadilan Rakyat (PKR) nopo nga’ kopotutan demokratik i nuru’ pantangon.
Ponorikohon Gabungan Rakyat Sabah (GRS) dilo’ minoboros, tikid tulun id sistem pulitik posimbayan om kikopotutan momonsoi sumpili’ kumaa parti i orohian do obian, om haal dilo’ kopokito nubasanan demokrasi di olidas id Sabah.
“Tantu’ no di ti do kopotutan demokrasi diolo’ montok momili’ parti i orohian obian. Minomili’ yolo’ montok tumanding id tikit PKR. Om kopiongoi nogi’, PKR nga’ tambalut piomungan id koporintaan,” ka disio soira’ rinubaan katalib ababayan pinisoinan Memorandum Pihunungan (MoU) id pialatan koporintaan pogun om Maybank montok manakadai projik Ekonomi Obulou id Sabah doid Menara Kinabalu, do hiti, di tadau baino’.
Minoboros isio dilo’ minongomi laang dii Datuk Jamawi Jaafar om Datuk George Hiew, i pogulu diti lansanon Gagasan Rakyat nga’ noondo pinangaran sabaagi calon PKR.
Hajiji, po nogi’ Presiden Gagasan Rakyat, pinoposotol haal dilo’ amu’ koponinong nunu-nunu kobolingkahangan kumaa GRS toi ko’ Gagasan Rakyat, tu’ kopokito ilo’ kinolumison om koyuyuon pulitik pogun Sabah.
“Montok doho, aiso’ kobolingkahangan – iti no koyuyuon pulitik i Sabah. Goduduo tulun dilo’ do noondo pohimagon calon PKR om okon nodii ko’ mongobi’ Gagasan Rakyat. Nokoidu’ no dahai yolo’. Nunu podii i komilo powonsoiyon? Ilo’ kopotutan diolo’ om pantangon tokou ilo’. Amu’ tokou kaanu mogodu – ilo’ wookon mantad demokrasi,” ka disio.
Hajii pinoposotol nogi do Gagasan Rakyat pointatap monokodung diolo’ sabaagi calon mantad komponen koporintaan Perpaduan.
“Pologoson nopo do miagal dilo’. Pointatap tokou manahak sokodung tu’ yolo’ nopo nga’ calon Pakatan Harapan,” ka disio.
Daamot dilo’, karait laang di Presiden UPKO, Datuk Ewon Benedick, i minongiliu karaja’ id Kabinet Pisompuruan om komoyon misuau pomusarahan di ningkakaton koporintaan Longkod, ka di Hajiji amu’ isio kasaga’ mongomi kotilombus.
“Amu’ tokou kaaanu manahak komen potilombus. Nakapalabus no yahai do kointalangan. Nung kaanu, kalansanan dahai koporintaan Pisompuruan do amu’ mokinsian. Nga’, nung momonsoi yolo’ kopokinsianan, ilo’ nopo nga’ kootusan diolo’,” ka disio toniba’.
Nokopogulu, Hajiji suminasi’ pinisoinan pibatosan dilo’ i po nogi’ iso’ inggisaman wagu koporintaan pogun montok papasarok koburuon siktor ikonomi mimpau intodonon maritim id Sabah.
