Hajiji (poindikau koonom, gibang) miampai lansanon GRS, puru kukumaraja’ pomilian agayo om mononokodung id Dataran Watas Okoro’ Kemabong di tadau baino’.
TENOM: Koporintaan pogun pinapalabus somok 40,000 ekar tana’ pogun mantad watas pasanganu Sabah Forest Industries (SFI) montok sinili rizab kampung, ka di Boyoon Montiri, Datuk Seri Haji Hajiji Haji Noor.
“Koporintaan pogun buruanon Gabungan Rakyat Sabah (GRS) pinopoimagon rizab kampung diti sabaagi kointalangan kopusohon kumaa kogugunoon rayat.
“Id pitimungan Dewan Undangan Pogun (DUN) di nakatalib, pinopolulus tokou lobi 40,000 ekar tana’ koporintaan mantad watas SFI montok tuduan diti,” ka disio ontok pinpoimpuun Kukumaraja’ Pomilian Agayo GRS Kemabong doid Dataran Watas Okoro’ Kemabong, do hiti, di tadau baino’.
Hajiji sinuau dilo puru GRS id Dataran Watas Okoro’ Kemabong di tadau baino’.
Hajiji minoboros, id siriba’ pomorintaan GRS, somboogian tana’ pasanganu komponi poinhompit koporintaan (GLC) nga’ pinoobi’ om pinoikid kumaa rayat montok papatantu’ kasasanangan diolo’ kotilombus poinjamin.
“Mimang tokou do rayat poinpasi osimbayan. Id siriba’ Palan Koburuon Sondikoton Sabah Maju Jaya (SMJ), iso’ mantad tukod dilo’ nopo nga’ kounsikahan rayat. Ilo’ pogi’, toririmo tokou poposuul kotundunan rayat,” ka disio.
Tumanud disio, pogulu diti kikiro no do 30,000 tulun poingulud sabaagi mamaramit ponguhupan kotundunan, nga’ ginumu’ dilo’ do noondo nokoingkawas kuminaa 70,000 tulun id siriba’ koporintaan noondo.
Hajiji pinopointalang nogi’ do koporintaan pogun nakaanu ogumu’ koundaran asil Pinibatosan Piuhupan Komersial (CCA) miampai PETRONAS, i nokopongukab kosiwatan lobi kagayo kumaa Sabah id pomorunan tumau om gas.
“Id siktor surupukaraja’ om kakamot tumau nogi’ gas (OGSE), noondo haro lobi 80 vendor nokoiyonon i nokogompit nung piadangon 10 nodi toun 2022,” ka disio i pinopoilo do vendor nokoiyonon noondo diti nakasanganu kikiro 36 pihatus pidagangan kuntirik.
Minoboros isio, okon ko’ miagal do pembangkang i sasaru’ mamain pulitik sumuli’ soira’ kikuasa’, koporintaan buruanon GRS moningkanan kumaa koburuon om komogoton maya’ Sondikoton SMJ 1.0.
“Nung rayat insan po do manahak mandat kumaa GRS, tilombuson tokou ababayan koburuon maya’ Sondikoton SMJ 2.0.
“Amu’ tokou mamain pulitik om amu’ mimpamatos ‘kusung’. Pasanganu tokou ababayan koburuon di atalang, nanamot pembangkang komilo no do mimbatos tulan om rombituon,” ka disio pinoposotol.
Id ababayan dilo’, Hajiji pinopoimagon nogi’ di Datuk Rubin Balang sabaagi calun GRS montok timpohon DUN Kemabong id Pomilian Agayo Pogun ko-17 do ko 29tw Kohopod om Iso’ diti.
“Miampai kukumaraja’ di ogirot om sokodung ouli’ mantad tongo’ mongungundi’ id Kemabong, Insya-Allah Datuk Rubin Balang insan po do kopomusus kalantaion id watas diti,” ka diso.
