Haji Hajiji Haji Noor
KOTA KINABALU: Boyoon Montiri, Datuk Seri Haji Hajiji Haji Noor pinopolombus kalansanan do inggisaman miagal BigSabah Sale kotilombus popoinggayo koromuton pidagangan om monginggirot nindikohon Sabah id pidagangan songkoiyonon om sompomogunan.
“Kalansanan ku impohon miagal BigSabah Sale kotilombus posuni piuhupan komersial om monginggirot pisarabakan ikonomi Sabah miampai BIMP-EAGA nogi’ korikod Asia Pasifik,” ka disio.
Hajiji minoboros, piuhupan di ogirot om kirati kosili posunduran kumaa kosunion komersial Sabah.
“Koporintaan pogun mongunsikou piuhupan miampai bohogian pomorunan om sokodung dilo’ i nakapasaga’ kinaparaladan kapadagangan, kinopoinggayaan pidagangan om koburuon pongindopuan montok mongindapu’ nokoiyonon.
“Kinorikotan tongo’ poopokito sompomogunan om momomoli i naalap tadau baino’ kopokito kotumbayaan di minimang ingkawas kumaa kosiwatan Sabah sabaagi waya’an sumuang pidagangan id Asia Kosilahon ASEAN,” ka disio ontok pinopoimagon BigSabah Sale id Longkod Konvensyen Sompomogunan Sabah (SICC) do hiti, di tadau baino’. Teks boboroson disio binasa’ di Montiri Kousinan, Datuk Seri Masidi Manjun.
Masidi minongob’ di Boyoon Montiri minomutul ribon ponokotanda’ kinopoimaganan BigSale Sabah 2025 id SICC, di tadau baino’.
Minoboros isio, BigSabah Sale kopokito kinomogoton po’ompus Sabah id kopoburuan ikonomi di ‘dinamik’ om sopiromut.
Ka disio, ababayan diti kopokito koponsolon kotonudan kapamansaian, piuhupan pomorunan om pisokodungan songkoiyonon sabaagi posiau agayo kosunion ogirot.
Hajiji minoboros do maya’ ‘inovasi’, kotilombuson om piuhupan pintar, Sabah masaan sumimban miampai monuntud sumili rikoton pongindopuan om kopoopuan kigatang akawas.
“Unsubon ku oinsanan tongo’ popokito, mongindapu’ om papaapu’ do momoguno kosiwatan diti miampai poinggonop – monuridong piuhupan wagu, mongukab ekosistem produk wagu om papapanau tongo’ pomusarahan wagu,” ka disio.
Minoboros isio, koporintaan pogun mangakun kaparagatan pongindopuan sabaagi ponokodung kaparagatan ikonomi om posiau kosudong kumaa kopogiromutan kopidagangan.
“Di tulan Kohopod om Iso’ 2022, koporintaan pogun minonuridong Sabah Convention Bureau (SCB) montok mongingkawas ginoris tumopong Sabah id kaganaan mitingan, insentif, pitimungan om pokikitanan (MICE).
“Maya’ piuhupan miampai papamanau pomorunan, SCB diti kotilombus papapamanau tonggungan oponsol id kopoinggirotan ekosistem ababayan pongindopuan miampai mongimbayat ababayan pomorunan nogi’ mongingkawas kohompitan Sabah id landskap ababayan global,” ka disio.
Minoboros isio, ababayan pongindopuan nopo nga’ ponoko’injin kosiwatan di kikuasa’ tu’ ilo’ kopongimbulai kaparagatan ikonomi okon nopo ko’ montok siktor koponompuanan om runcit, nga nogi’ logistik, pomutanaman, tiknologi om kapamansaian.
“I oponsol nogi’, koponginggirot ilo’ do piromutan pangaba’ nokoiyonon om koburuon bakat,” ka disio.
Hopod om tolu pomogunon – Brunei, Indonesia, Filipina, Thailand, Singapura, China, Hong Kong, Taiwan, Korea Selatan, India, Turki, Mesir om Pakistan – minaganu bohogian id BigSale Sabah toun diti.
