Haslina ontok rinubaan media.
KOTA KINABALU: Koupisan Haal Koonduan (JHEWA) Sabah papaanjur tolu ababayan agayo moningkanan do kopongindopuan, kopomuruanan om kopurimanan undang-undang kopohompit lobi 2,000 koonduan po’ompus wulan Kohopod om Iso’ diti.
Potunud JHEWA, Haslina Ismail minoboros kopoindalanan tongo’ ababayan dilo’ kapagaras koonduan mantad mogisusuai nayatan mogigiyon do mongimbulai koonduan kitoilaan, kopimpoopori, karati kopotutan diolo’ id sunduk undang-undang om kitonggungan aparagat id koburuon mogigiyon.
“Ababayan kopongindopuan JHEWANITA i pinatantu’ do ko 18tw Kohopod om Iso’ atanud kikiro 500 tutumanud koonduan miampai moningkanan do koburuon kopongindopuan maya’ sesi piilangan toilaan, kapabantaan om pibabarasan miampai mogisusuai kotinanan poinhompit.
“Suai dilo’, Ababayan ‘Pemerkasaan NGO Wanita Sabah’ do ko 20tw Kohopod om Iso’ pikikiro kopotimung 1,000 tutumanud mantad mogisusuai kotinanan koonduan pototongkop pogun.
“Ababayan diti koposotol pintoriningan koponguludan kotinanan, kararalano’ ‘protokol’ om kopomuruanan mooi do NGO koonduan Sabah lobi kiwaya’ om kigironis tumopong.
“Naamot dilo’, Ababayan ‘Wanita Peka Undang-Undang’ do ko 27tw Kohopod om Iso’ nopo nga’ manahak koposuulan kumaa kopoingkawasan korotian koonduan kumaa kopotutan koundangan, koumoligan tinan, pongumoligan mantad koponindualan om kopoimamangan,” ka disio.
Tun Musa (koonom, gibang), Toh Puan Faridah (kolimo, wanan) guminambar
Minoboros isio dilo’ soira’ rinubaan media katalib kotombuluyan apantang kumaa di Molohingon Agayo Pogun, Tun Musa aman om sawo, Toh Puan Faridah Tussin, di tadau Kotolu.
Kinotombuluyan dilo’ kituduan popoilo kinoburuon kaawagu Ababayan GLOW at Sabah, i ninggisaman do JHEWA om Kounsol Monontuduk Koonduan Sabah (MPWS) i minanahak koposuulan kumaa koburuon koonduan kikosiwatan akawas id kaganaan balajaran, ikonomi om kopomuruanan.
“Maya’ do GLOW at Sabah, orohian tokou papaharo koonduan sabah i kaanu tumopong id nayatan sompomogunan i okon nopo ko’ kalantoi id kaganaan akademik om ikonomi, nga’ nogi’ kiginawo kopomuruanan.
“Tingkanonon kopio tokou nopo nga’ popogoris koonduan mantad mogisusuai nayatan mogigiyon miagal ‘ibu tunggal’, koonduan B40, mongindapu’ om lansanon NGO mooi do lobi yolo’ kikotumbayaan, kitoilaan nogi’ kaanu sumili ejen kosimbanon,” ka disio.
