Joniston Bangkuai
KIULU: Parti Bersatu Sabah (PBS) kiharo ginoris montok mongigit tonggungan monguhup Gabungan Rakyat Sabah (GRS) kotilombus ogirot om monguasa’ katalib kinolobusan Parti STAR om SAPP mantad piomungan dilo’.
Luguan Kopointalangan PBS, Datuk Joniston Bangkuai minoboros, PBS amu’ korosi di kootusan duo parti dilo’ montok amu’ tumilombus miampai GRS, om pinoposotol do PBS nakawaya’ no mogisusuai kaantaban pulitik di lobi kagayo.
“Iti no demokrasi, nga’ id timpu miagal kaadangon om pisompuruan amu’ kasaga’ poindisanon, om hiti no PBS tumilombus papamanau tonggungan,” ka disio ontok tuminindapou Ababayan Mikorumo Miampai Rayat id Kampung Rungus Panansawa, do hiti, baino’.
Joniston minintong koiyonon pososorili’ ralan pomutanaman wagu Balabakan – Singgaron miampai mogigiyon kampung.
Joniston, po nogi’ Luguan Kopointalangan GRS om mongigit timpohon Lintuhun Undangan Pogun (DUN) Kiulu, pinoposotol do kotumbayaan kumaa PBS om GRS mantad no do kinogiroton, kopomuruanan mimpau nayatan siriba’ nogi’ nawawaya’an monoguang kosimbanon ‘dinamik’ pulitik pogun.
“Nakawaya’ tokou ogumu’ fasa kinosimbanon, nga’ prinsip tokou iri kasari’, ilo’ nopo nga’ manahak surupukaraja’ miampai poinponu’ tinonggungan om moningkanan rayat.
“PBS toririmo kosili tukod kaadangon id GRS, papatantu’ piomungan diti kaanu monumboyo’ angkabon rayat Sabah,” ka disio i minoboros do parti dilo’ tumilombus papapanau tonggungan oponsol id kopotontuan GRS kotilombus ogirot om kitonggungan miampai katatapan i moningkanan do rayat om kikoyuon ‘realistik’.
PBS nopo nga’ iso’ mantad onom parti komponen GRS miampai Parti Gagasan Rakyat Sabah (Gagasan Rakyat), United Sabah National Organisation (USNO), Parti Harapan Rakyat Sabah (PHRS), Liberal Democratic Party (LDP) om Parti Cinta Sabah (PCS).
Naamot dilo’, Joniston suminiwat nogi’ ruminuba’ mogigiyon Kampung Balabakan, hinombo do pinopoimagon isio pinongukaban ralan pomutanaman wagu id kampung dilo’.
Pomutanaman nopo nga’ wookon tingkananon kopio id palan koburuon Kiulu montok monginggirot kasasanangan koposion om kogogonopan mogigiyon nokoiyonon.
