KOTA KINABALU: Dewan Bandaraya Kota Kinabalu (DBKK) pinapahabar do Taman Botani Tun Fuad Stephens id Bukit Padang ukaban kawagu kumaa tulun ginumuan mimpuun tadau Koiso’, ko 27tw Kohopod 2025.
Ka di DBKK, kootusan dilo’ winonsoi nosusuhut kinalantaion Ababayan Brisk Walk Pra Pongukaban i pinoindalna di kaawagu diti montok minintong rontob koumoligan om kosudongan waya’an joging di poinharo mantad. Asil pinogintongan nokokito karaja’ ngaawi’ id koiyonon dilo’ do noondo diti kopohompit po do sunduk koponguludan om pomogonop, amu’ kopohompit nunu-nunu ponuridongan awagat.
Kohondot dilo’, waya’an joging ukaban kawagu kumaa tulun ginumuan tumanud di kotonudan kooturan koumoligan om puralan do DBKK. Waya’an tumakad (hiking trail) nga’ nukaban nogi kawagu suai ko’ Trek Hiking No.2 i kakal sinompon tu’ kawaya’ do koiyonon Longkod Botani i kakal id fasa masaan wowonsoiyon.
Timpu kopoindalanan taman pinatantu’ mimpuun jaam ko 6 kosuabon gisom ko 7 sodopon monikid tadau, maganu kokiraan kakal haro karaja’ koponuridongan id pipiro koiyonon suai doid taman dilo.
Poingkuro po, DBKK pinopoilo pipiro koiuyonon kakal somponon poinponu’ kumaa tutumombului mantad no do haal koumoligan tu’ kakal id koponuridongan. Koiyonon di poinhompit nopo Longkod Botani (Botanical Centre), Commercial Plaza, Boardwalk om Lake Walk, Conservatory Park om Bamboo Corner, nogi’ Herb Garden.
DBKK pinoposotol nogi’ do nunu-nunu koponugkuan kumaa koiyonon amu pasagaon nopo nga’ pogoduhan kopio om bohogian disio amu’ maganu tonggungan kumaa nunu-nunu koligaganan toi kosinduolan gama-gama’ koponohuban kopogoduhan dilo’.
Id timpu nogi’ diti, DBKK masaan popoindalan karaja’ koposodiaan om kapadakatan papan tanda kopoilaan, papan kopogoduhan nogi’ potuduk ongoiyon montok papatantu’ koumoligan om kasasanangan tutumombului poinjamin.
Naamot dilo’, kuntiriktor i kitonggungan kumaa Projik Koponuridongan Taman Botani Tun Fuad Stephens minaan ontoko’ do ‘Liquidated Ascertained Damages’ (LAD) kiginumu’ RM2,704.61 sangadau minimpuun di ko 15tw Koturu’ 2025 gisom oinsanan karaja’ pamansaian opongo poinponu’ tumanud katatapan om kotontuan pinatantu’.
DBKK lumansan tulun ginumuan do kapanahak kouhupan poinponu’ miampai mananud ponuhuan koumoligan nogi’ manamong koburision taman montok papatantu’ kopomogompian om kasasanangan oinsanan kotilombus pointamong.
