KOTA KINABALU: Sekreatariat Sabah Maju Jaya (SSMJ) minogolim do nunu-nunu kinogompitan id kopouyuhan ponguhupan kousinan, geran toi skim pinotomod i masaan nokotonu’ maya’ aplikasi WhatsApp, pason mimpoopori om pawaya’an amu’ nookunan id suai.
Id kointalangan di tadau baino’, SSMJ pinopointalang do bohogian disio nokoilo pipiro pongumbalan pangakalan i momoguno ngaran SSMJ montok mangaangakal tulun ginumuan miampai kopouyuhan pilasu do kaka pinalabus do sekretariat dilo’.
“Montok kopoilaan, SSMJ amu’ insan palabus nunu-nunu koupouyuhan ponguhupan kousinan, geran toi skim pinotomod kumaa tulun ginumuan maya’ nombo-nombo pawaya’an piromutan di amu’ pohimagon,” ka do kointalangan dilo’ pinosotol.
Ka do SSMJ, nunu-nunu kapahabaran toi kopouyuhan pinotomod porikoton no maya’ pawaya’an pinotomod Koporintaan Pogun Sabah toi portal pinotomod SSMJ.
Tulun ginumuan nga’ pinosorou nogi’ mooi do mingat-ingat om amu’ obintumbayaan nunu-nunu ‘mesej’ di kosusuayan i momoguno ngaran SSMJ.
SSMJ nga’ minokianu nogi’ tulun ginumuan do amu’ popoilang kointalangan tinan toi popowonsoi nunu-nunu ‘transaksi’ kousinan kumaa bohogian amu’ otutunan, nogi’ sumikap momonsoi ruputan pulis nung karamit no do pason i kotumbayaan sabaagi pongudutan.
“SSMJ mamason tulun ginumuan do maganu kointalangan otopot maya’ nodi laman web pohimagon Koporintaan Pogun Sabah om ‘platform’ media sosial pinotomod SSMJ,” ka wagu do kointalangan dilo’.
SSMJ lumansan kopointalangan dilo’ kopoingkawas kopurimanan ginumuan om mongilag tulun ginumuan mantad koimanang di takal-akal pongudutan i momoguno ngaran SSMJ.
