Fredolin (tanga’, kotolu gibang) guminambar miampai puru PBS Inanam.
KOTA KINABALU: Parti Bersatu Sabah (PBS) Bohogian Inanam pinoposotol do nuludan kopomuruanan dau kakal ogirot om amu’ noumpadanan nosuushut laang Puru Kounsol Akawas PBS, Datuk William Majimbun, i po nogi’ bagas Lansanon Koburuon Mogigiyon (UPPM) N.18 Inanam suminompuru Parti Warisan.
Luguan Bohogian PBS Inanam, Fredolin Totin Bangon minoboros, haal dilo’ nopibabarasan id mitingan bohogian i pinaharo konihab, hinombo do oinsanan puru om kopomuruanan bohogian ouli’ rolou pinoposotol tonggungan diolo’ montok tumilombus misompuru nogi’ moningkanan poinponu’ kumaa posodiaan monoguang Pomilian Agayo Pogun (PRN) Sabah ko-17 do obontol.
“Kootusan di Datuk William amu’ tomod kopolomog sunduan puru om mononokodung PBS id Inanam. Nga’, kopogirot nogi’ angkab dahai montok tumilombus popoburu’ prinsip om poburuon parti i mimpai kinotulidon, kaadangon, nogi’ koponsolon rayat Sabah,” ka disio id kointalangan di tadau baino’.
Fredolin minoboros, PBS Inanam kakal poingigit di ningkakaton montok mungkakat ogirot id siriba’ kopomuruanan parti om papapanau tonggungan aparagat montok papatantu’ kalantaion Gabungan Rakyat Sabah (GRS) id PRN17 diti.
“Tumilombus yahai mamanau sabaagi iso’ tiim montok papatantu’ kaadangon pulitik pogun nogi’ timpu dumontol rayat Sabah kotilombus poinggompi’,” ka disio kawagu.
Kapt:
