Nizam Abu Bakar Titingan
KOTA KINABALU: Luguan Kopointalangan Parti Gagasan Rakyat Sabah (Gagasan Rakyat), Datuk Nizam Abu Bakar Titingan minokianu oinsanna pakakaraja’ Gabungan Rakyat Sabah (GRS) do lumintuhun kumaa koiyonon miampai sunduan wagu om angkab akawas montok monoguang Pomilian Agayo Pogun Sabah ko-17 (PRN17).
Minoboros isio, mantad pinomohuyasan Lintuhun Undangan Pogun (DUN) Sabah om kinopoimpuunan pinotomod Kukumaraja’ Pomilian Agayo GRS, poburuon montok momusus kaadangon om komogoton pogun do noondo nokotimpuun.
“Iti no timpu dau montok dati’ do lumintuhun padang miampai sunduan #RumahKitaKitaJaga, tu’ Sabah diti walai tokou om tonggungan tokou oinsanan do manamong dilo’,” ka disio id kointalangan di tadau baino’.
I Nizam pinoposotol do pason agayo GRS diti baino’ nopo nga’ #KitaJagaSabah, sabaagi kokitanan angkab papatantu’ Sabah kotilombus ogirot, otunda’ om misompuru id siriba’ panji piomungan dilo’.
“Apat impohon kopoburuan – #SabahFirst, #SabahForward, #SabahProsper om #SabahUnited – mositi’ do posion tokou id tikid laang kopoburuan, mantad walai kumaa walai, mantad ginawo kumaa ginawo rayat,” ka disio.
Pinointutunan nogi’ disio sunduan wagu #SabahTanahAirku sabaagi kokitanan kolisihan om kotiu’on rayat kumaa pogun Sabah.
“Iti okon ko’ slogan nopo, nga’ tanda’ koupusan om kotiu’on tokou kumaa pomogunan Sabah. Kanou tambalut ngaawi’, pogurao’ tokou kukumaraja’ miampai sunduan di miibagal miagal di pogulu,” ka disio kawagu.
Nunsub nogi’ di Nizam mooi do tikid kukumaraja’ om mononokodung GRS momoguno tanda ‘pagar’ pinotomod miagal do #RumahKitaKitaJaga, #KitaJagaSabah, #SabahTanahAirku om #GRS id tikid kapaatadan doid media sosial montok monginggirot pason kopoburuan piomungan dilo’ dumontol pomilian agayo.
