Dr. Joachim (koduo, gibang) minamaramit dokumen montok kosompuruan wagu mantad di Nazrul.
KUNDASANG: Mongigit Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam pinoposotol tonggungan koporintaan Gabungan Rakyat Sabah (GRS) montok tumilombus popoburu’ sukod wagu sabaagi poimpahan kumaa komogoton timpu dumontol pogun kopiongoi di palan koburuon Sondikoton Sabah Maju Jaya (SMJ).
Minoboros isio, mogisusuai inggisaman di nokowonsoi om mamaso poindalanon kumaa kapagarasan koburuon ‘modal insan’ mooi do komulakan Sabah kotilombus kumaa toguang id mogisuai kaganaan.
“Mogisusuai inggisaman nowonsoi montok mogowit sukod wagu tumilombus kumaa toguang kopiongoi di palan koburuon Sondikoton Sabah Maju Jaya.
“Okito iti id kinapatahakan ponguhupan balajaran pogun Sabah i kopohompit mogisusuai koyuon miagal sikulasip, derma siswa, tabung balajaran, kakamot om ponguhupan tunui,” ka disio ontok ruminuba’ komulakan id Kampung Dumpiring Bawah, do hiti di tadau Kolimo.
Dr. Joachim (koonom, gibang) ruminamit foom kosompuruan wagu mantad Kampung Patau.
Dr. Joachim po nogi’ Ponowoli Presiden Parti Bersatu Sabah (PBS) minoboros, miampai poinpuli ponguhupan balajaran dilo’ kituduan mongingkawas naangayan balajaran id Sabah nogi’ papatantu’ lobi kogumu’ sakag pogun kopongoput balajaran miampai aiso’ kohimpogong om koinggoritan kousinan.
Id ababayan dilo’, minamaramit nogi’ isio foom kosompuruan wagu PBS i pinotunui di Nazrul Mohamin om minonuau kinosuangon diolo’ id suang parti.
Dr. Joachim minoboros, suai ko’ haal balajaran, koporintaan GRS moningkanan nogi’ do kasasanangans sosial komulakan kaampai no maya’ ababayan pomuwalaian Rumah Mesra Sabah Maju Jaya montok mikoruhang tomulok i wagu kapanansawo.
Montok tuduan idlo’, Boyoon Montiri, Datuk Seri Haji Hajiji Haji Noor di kaawagu diti pinapahabar pomoruhang 10 unit Rumah Mesra SMJ id tikid koiyonon DUN mimpuun toun tiso’, koposili koinsanai 50 unit id tikid DUN nung piagalon di 40 unit toun diti.
“Laang diti kopokito kopusohon koporintaan GRS kumaa kogugunaan komulakan, kosuul no mikoruhang omulok i orohian monuridong koposion sondiri,” ka disio.
Kohondot dilo’, Dr. Joachim pinoposotol do kosodia’on disio montok monilombus ababayan koburuon di poinharo mantad nogi’ popogoris inggisaman ‘pasca’ Pomilian Agayo Pogun (PRN) ko-17 montok papatantu’ komogoton rayat id Kundasang kotilombus poinjamin.
Nokotindapou nogi’ Luguan Komulakan PBS Kundasang, Khairol Majide Kalimin nogi’ lansanon nokoiyonon.
Suai ko’ id Kampung Dumpiring Bawah, Dr. Joachim minamaramit nogi’ kosompuruan wagu PBS mantad mogigiyon Kampung Patau.
