Dr. Joachim (koturu’, wanan) miampai di Linda (koonom, gibang) guminambar pongingitanan miampai wookon mantad pakakaraja’ ponorinaan DUN Kundasang nogi’ i nakaampai id ababayan dilo’.
RANAU: Kopoindalanan koburuon id watas Lintuhun Undangan (DUN) Kundasang pinoindalan miampai poinpuli om kopotonggoi ngaawi’ amu’ mogintong piwolitan kampung, potilombus dino kopokito tonggungan koporintaan Gabungan Rakyat Sabah (GRS) id kopotontuan kasasanangan rayat doid nayatan siriba’.
Mongingigit Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam minoboros, projik koburuon kaampai ponuridongan lintuhun mini, jambatan gantung om talun-alun pinoindalan montok papatantu’ tikid koiyonon kaanu koundaran miampai aadang.
“Koburuon poindalanon miampai aadas id oinsanan kampung. Ounsikou oku kokito ogumu’ walai do noondo lobi kosonong ko’ mantad di pogulu. Karaja’ koporintaan nopo montok poinbobos om manahak surupu bobos osonong montok kasasanangan rayat,” ka disio.
Minoboros isio dilo’ id Ramai Mirumo-rumo miampai mogigion id pipiro Longkod Watas Mongundi (PDM) id watas DUN Kundasang, do hiti.
Dr. Joachim tuminabi’ om monongkirumo dilo mogigiyon kampung i nokotindapou id Ababayan Mirumo-rumo miampai mogigiyon kampung id PDM suang DUN Kundasang.
Ababayan nopo dilo’ nga’ wookon mantad kinotombuluyan apat tadau mimpuun ko 15tw Kohopod katatalib i kopuli do kampung ilo’ nopo nga’ Kampung Dumpiring, Kampung Kaingaran, Kampung Wayan, Kampung Tumbalang, Kampung Kieyep, Kampung Nalumad, Kampung Togop Darat, Kampung Sinurai om Kampung Karagasan. Pinaharo nogi’ ramai kinopoimaganan lintuhun mini wagu.
Dr. Joachim minoboros, poompus kinotombuluyan dilo’ kikosiwatan isio ruminumo mogigiyon nokoiyonon om pinapaharo ababayan piudia’an simbar.
“Nung karamit mandat mantad rayat, GRS monilombus koburuon id DUN diti om pototongkop Sabah,” ka disio.
Pinosotol nogi’ disio do id koponongkinanan do koburuon poinginan, koporintaan pogun id siriba’ buruanon GRS miampai piuhupan Pakatan Harapan (PH) tumilombus mongigit kumaa prinsip monginggirot ‘autonomi’ pulitik Sabah om popoburu’ kopotutan rayat pogun diti.
“Kada’ koburilong, manu tokou tulun tokou sondiri manamong Sabah. Slogan ‘Walai Tokou, Yati’ Manamong’ okon ko’ pagkakaa pulitik nopo, nga’ prinsip kopoburuan mooi do rayat Sabah kotilombus onuan kotumbayaan momorinta’ pogun tumanud karalano’ sondiri,” ka disio pinoposotol.
Ka disio, piuhupan id pialatan GRS om PH amu’ kopongumpadan nindikohon Sabah sabaagi popotunud agayo pomorintaan pogun, tu’ koponginggirot piromutan koburuon miapmai koporintaan Pisompuruan.
“Yati’ popotunud montok Sabah, naamot koporintaan Pisompuruan pomogonop om monguhup dati’,” ka disio pinopointalang.
Dr. Joachim pinopoindalan kinopoimaganan lintuhun mini Kampung Nalumad
Dr. Joachim nga’ pinopolombus nogi’ kopongunsikohan kumaa oinsanan bohogian i pinapalantoi ababayan dilo’ om minamatos montok popoburu’ koponsolon rayat nung onuan no do mandat kawagu katalib Pomilian Agayo Pogun (PRN) ko-17.
Minoboros isio, koporintaan GRS nga’ toririmo poposuul kotundunan om koburuon modal insan, kaampai maya’ kinopoingkawasan sikulasip susumikul nogi’ inggisaman Rumah Mesra SMJ, i rinuhangan kuota kuminaa 50 unit montok tikid DUN nung oonuan no do kotumbayaan kawagu.
Nokotindapou nogi’ id ababayan dilo’ sawo di Dr. Joachim, Datin Seri Linda Ewit, tongo’ upisor DUN Kundasang om lansanon nokoiyonon.
