Hajiji pinopowonsoi gimik Kinopoimpuunan Pakakaraja’ Pomilian Agaho om Loyou GRS.
KOTA KINABALU: Koporintaan Gabungan Rakyat (GRS) nokopokito ginoris om kinopulokison id kinopogowitan Sabah kumaa rontob naangayan di kopoondos po’ompus limo toun minomorinta’ pogun diti.
Boyoon Montiri, Datuk Seri Haji Hajiji Haji Noor minoboros, kinalantaion dilo’ nosigampot mantad kinopoindalanan katatapan Sondikoton Sabah Maju Jaya (SMJ) i nosili susuyon oponsol koburuon pogun, nokopokito nopuhu bobos akawas id susuyan kahandaman nogi’ kinosunion osikap id siktor pomorunan, ponombuluyan om pomutanaman.
“Id timpu miagal, mogisusuai inggisaman balajaran om koburuon modal insan tilombuson papagaras, suai ko’ ponguhupan kotundunan pinoinggayo montok papatantu’ kasasanangan rayat Sabah toririmo poinggompi’,” ka disio ontok pinopoimpuun Pakakaraja’ Pomilian Agayo GRS id Longkod Konvensyen Sompomogunan Sabah (SICC), do hiti, di tadau baino’.
Hajiji i po nogi’ Ponorikohon GRS minoboros, koporintaan pogun pointotopot nogi’ monoibau kobolingkahangan kogogonopan rayat miagal pangaba’ waig, talun-alun om lotirik.
Ka disio, soginumu’ 18 projik waig masaan poindalanon id pototongkop pogun kaampai Projik Wokok Waig Tawau, Loji Pongubatan Waig (LRA) Kogopon 2 id Papar om Projik Monginsonong ‘Muka Sauk Kabang’ i pikikiro opongo do toun tiso’.
“Koporintaan pogun okon nopo ko’ pinopoindalan om minonginsonong ralan pogun, nga nogi’ miniuhup oronit miampai koporintaan Pisompuruan montok papatantu’ koponginsonongan ralan pisompuruan nogi’ pamansaian Ralan Agayo Pan Borneo koindalan tumanud timpu nakatantu’,” ka disio i minongoput do Fasa 1B projik dilo’ do noondo pinoindalan id siriba’ pomorintaan GRS.
Minoboros isio, id siktor ginoris nopo, koporintaan minaganu laang ‘proaktif’ miampai minonimpuun Projik Wokok Hidro Ulu Padas id Tenom, naamot kapambayaran Projik Southern Link kigatang RM765 riong i pinahabar di Luguan Montiri kapamajamin kopulokison sistem ginoris id Tisan Kosilahon Sabah.
“Koporintaan GRS pinopolombus kopongunsikohan kumaa Luguan Montiri mantad sokodung po’ompus kumaa Sabah, kaampai id kinopoburuan pinopoudong kopotutan pogun miagal poinsurat id Pibatosan Malaysia 1963 (MA63),” ka disio.
Hajiji pinoposotol kinalantaion Sabah minongukab siktor tumau om gas maya’ pibatosan Commercial Collaboration Agreement (CCA) miampai PETRONAS i kopongukab kosiwatan lobi kagayo kumaa Sabah montok gumompit miampai mitilombus id piromutan pomorunan dilo’.
Ka disio, maya’ pibatosan dilo’, Sabah okon nodii ko’ tumalahannopo do royalti om sukai kadagangan, nga’ nogi’ nakaramit asil mitilombus, kosiwatan pakarajaan nogi’ kinalabaion ikonomi maya’ kinogompitan komponi nokoiyonon id pomorunan tumau om gas.
Minagada’ isio totondos pembangkang do kaka om koporintaan GRS amu’ nakaanu minomorinta’ pogun sabaagi aiso’ nimpohon om pinsingumbalan nopo do momurilong rayat.
“Amu’ tokou toi nakalantoi miampai rikod om naangayan di ogumu’ nosigampot tokou? Amu’ tokou toi nakalantoi i pinopowonsoi inggisaman bobos osonong montok rayat Sabah?” ka disio minoguhot.
Ka di Hajiji, wookon naangayan agayo suai nopo kinalantaion koporintaan GRS pinapatahak hinapadan noribu ekar geran tana’ kumaa mogigiyon maya’ ababayan PANTAS, suai ko’ pinopoimagon hinapadan kampung sabaagi rezab kampung id pototongkop pogun.
Minoboros isio, do pembangkang i amu’ nakaanu minomorinta’ miampai poinsonong di ontok kikuasa’ om noondo papasasad batos amu’ kosuang pomusarahan kaampai no kaka om kaanu manalasai kobolingkahangan waig id suang sontoun nogi’ kopongimbulai 50,000 injinior id timpu oruhai.
“Rayat do noondot lobi komilo mogintong isai i otootopot kaanu momorinta’ om isai i komilo nopo papasad retorik nogi’ batos pulitik.
“Tingkod no papadagang ‘tubat batos’ i kapagauk nopo rayat i tuuhan do panalasaian. Kada’ siliu do ‘dukun’ pulitik – ogumu’ rinait, nga’ aiso’ kolingoson poinponu’,” ka disio.
