Hajiji miampai presiden om lansanon parti komponen GRS id Ramai Kopoimpuunan Kukumaraja’ Pomilian Agayo GRS.
KOTA KINABALU: Gabungan Rakyat Sabah (GRS) otumbayaan kaanu kalantaion id Pomilian Agayo Pogun (PRN) Sabah ko-17 mantad pisompuruan, kososodia’on om sunduan karaja’ kukumaraja’ parti id oinsanan nayatan.
Boyoon Montiri, Datuk Seri Haji Hajiji Haji Noor i po nogi’ Ponorikohon GRS minoboros, kinopoimpuunan kukumaraja’ GRS kosili kosiwatan oponsol montok monginggirot karaaralano’ om nogi’ sunduan oinsanan puru dumontol PRN i pikikiro koindalan do wulan tiso’.
“Nung pasanganu tokou kukumaraja’ di kiwaya’, nokotorining om miiso’ ginawo, insya-Allah GRS koposurat kalantaion id PRN Sabah ko-17,” ka disio ontok pinopoimpuun Kukumaraja’ Pomilian Agayo GRS id Longkod Konvensyen Sompomogunan Sabah (SICC), do hiti, di tadau baino’.
Pinoposorou isio kukumaraja’ parti mooi do amu’ kalawong, nga’ tumilombus kumaraja’ ogoris papatantu’ kalantaion agayo montok monilombus Sabah id siriba’ pomorintaan koporintaan di ogirot om kitonggungan.
“Mositi’ tokou poposindak sunduan monokisahap om monginggirot piisaan. Miampai sunduan di ouli’ om piisaan di ogirot, aiso’ ginaras sangod i kaanu monginraag poburuon tokou,” ka disio pinoposotol.
Hajiji minoboros, sundung duo parti momili’ luminabus mantad piomungan dumontol pomilian agayo, ginaras om pisompuruan GRS kakal ogirot tu’ i poburuon diti mimpau kinotulidon ginawo om piombolutan di ouli’ montok timpu dumontol Sabah.
“Kinaantakan ‘Langkah Kinabalu’ nokoponuduk dati’ do haal di agayo kopio gatang – walai tokou noumbalan no, om walai tokou amu’ nopuhut. Walai tokou, yati’ tumamong; walai tokou, walai Gabungan Rakyat Sabah!” ka disio.
Minoboros isio, GRS nopo nga’ kokitanan piuhupan ogirot tongo’ parti ngaawi’ nokoiyonon bobos agayo id Sabah, om aiso’ piomungan suai i kaanu tumopong ginaras dilo’.
“Aiso’ no dii piomungan kaagal ginayo do GRS i koponompuru parti ngaawi ‘nokoiyonon miampai sondikoton popoburu’ kopotutan tulun Sabah sabaagi tambalut miilang id Malaysia. Ilo’ pogi’ do oponsol montok dati’ papatantu’ GRS okon nopo ko’ kalantoi, nga’ kalantoi miampai poinponu’ gaya!” ka disio.
Hajiji pinoposotol, do PRN diti baino’ okon nopo ko’ piahawan kuasa, nga’ pisahapan montok papatantu’ sondikoton om timpu dumontol Sabah.
“Kalantaion GRS kapanahak dati’ do rolou lobi kagayo id kopoburuan kopotutan pogun nogi’ papatantu’ nimpohon koburuon di poinharo mantad kotilombus. Nung amu’ kalantoi, rayat om pogun diti i oimamang,” ka disio.
Minongunsub nogi’ isio kukumaraja’ GRS id oinsanan nayatan do kikomilaan id media sosial montok mongilag totondos om papatahak kointalangan otopot kumaa rayat.
“Pembangkang papasasad totondos om pagkakaa id media sosial. Nung manangod yolo’ momoguno tudut, mositi’ tokou manangod kawagu miampai katatapan om kointalangan,” ka disio.
Ka disio, tikid puru nuru’ sumili poporikot kointalangan kohunung, kitonggungan om kikointalangan montok mongilag totondos ponokosahap.
“Kada’ pologoso’ Sabah koguli’ id longon diolo’ i amu’ nakalantoi minomorinta’, aiso’ sondikoton atalang om mimpulitik nopo mantad kopurimanan sumuli’ nogi’ koundaran sondiri.
“PRN ko-17 diti baino’ okon ko’ pisahapan nopo id kinoiyonon, nga nogi’ id piromutan. Kaganaan media sosial nosili gelanggang agayo monuridong pomumusorou rayat. Kalantaion GRS ogumu’ lumansan songkuro sinodu’ tokou kaanu monguasa’ kaganaan diti miampai pason di atalang, otimpas om kiwaya’,” ka disio pinoposotol.
Hajiji minoboros, nung oinsanan pakakaraja’ GRS misompuru, opulokis om ‘kreatif’ momoguno sosial sabaagi kakamot piromutan oponsol, nga’ aiso’ pagkakaa (propaganda) pembangkang i kaanu momidsala’ kotumbayaan rayat kumaa GRS.
Pinosotol disio sunduan kumaraja’ GRS amu’ atalup sundung pia potoguang kaantaban agayo.
“Nulu di akawas takadon tokou kasari’, rahat di aralom loyogon tokou. Walai tokou, yati’ tumamong – nung okon ko’ yati’, isai podi?” ka disio.
