Armizan (kotolu, wanan) minoboros id kapahabaran media doid SICC di tadau baino’.
KOTA KINABALU: Gabungan Rakyat Sabah (GRS) poposili do ‘reformasi’ (kosimbanon) undang-undang om ‘institusi’ (kotinanan) sabaagi wookon pouyuhon agayo id manifesto Pomilian Agayo Pogun (PRN) Sabah 2025, ka di Kumoduo Monunurat Agayo dilo’, Datuk Armizan Mohd. Ali.
Minoboros isio, ababayan nopo dilo’ nga’ kotilombuson inggisaman i pinogura’ pointonod toun 2021 gisom 2025, om tilombuson monginggirot mimpuun toun 2026 sabaagi wookon mantad tonggungan po’ompus koporintaan pogun.
“Kosimbanon diti okon ko’ batos nopo id manifesto, nga’ palan karaja’ timpu anaru i nokoindalan om mamaso poindalanon montok monginggirot sistem pomorintaan nogi’ koundangan pogun,” ka disio id kapahabaran media do hiti, di tadau baino’.
Pointonod GRs minonowoli pomorintaan pogun di wulan Kohopod om Iso’ 2020, kiginumu’ 51 enakmen pogun di noturidong toi sinimbanan montok monginggirot mogisusuai haal undang-undang pogun. Wookon di agayo kaampai Enakmen Poguludan Sampal Asangkayu om Pomurisian Ginumuan 2022, Enakmen Suruhanjaya Ginoris Sabah 2023, Enakmen Pangaba’ Gas 2023, nogi’ Enakmen Koundangan Pogun Sabah (Ponimbanan) 2023 i pinopointutun kooturan kopohompit ‘anti lompat’ (magada’ tumindak) parti.
Suai dilo’, pipiro akta wagu nga’ pinointutunan miagal Enakmen Pangaba’ Lotirik 2024, Enakmen Ginoris Aanu Monginwagu Sabah 2024 om Enakmen Kosimbanon Iklim om Koponguludan Karbon Sabah 2025, kopiongoi di tingkananon koporintaan pogun kohondot ababayan ginoris oburisi’ om kopomogompian sandad posorili’.
Pinointalang nogi’ di Armizan do wookon kinalantaion oponsol id sunduk kosimbanon kotinanan nopo nga’ kapagarasan Koupisan Luyar Agayo Pogun Sabah (JPBNS) montok monompuan koinsanai kes pomusalaan id siriba’ undang-undang pogun Sabah.
Minoboros isio, laang dilo’ kapasaga’ JPBNS papapanau tonggungan sabaagi Kumoduo Mamadawa Agayo (Deputy Public Prosecutor), potilombus dino mongingkawas waya’ kopogirotan kuasa’ nogi’ laang pamadawaan.
“Kolulusan kapagarasan diti pinoimagon maya’ Warta Koporintaan Pisomuruan di ko 6tw Kaapat 2023. Pointonod dilo’, nombo-nombo kotinanan nuru’ maganu kasagaan mantad JPBNS pogulu monimpuun pamadawaan kohondot kasalaan id siriba’ undang-undang pogun miagal Ordinan Tana’, Enakmen Kotolunan om Enakmen Pongumoligan Sandad,” ka disio.
Ka disio, kolulusan dilo’ nga’ kapasaga’ nogi’ Koupisan Luyar Agayo Pogun moningkanan kumaa kasalaan id siriba’ undang-undang pogun Sabah i pogulu diti poindalanon do Koupisan Luyar Negara.
Daamot dilo’, minoboros i Armizan, koporintaan pogun nga’ minonuridong Kounsol Monontuduk Ponginwoguan Undang-Undang Sabah (SLRAC) di ko 31tw Koturu’ 2025 sabaagi wookon mantad karalano’ monginggirot ababayan kosimbanon undang-undang om kotinanan.
Kounsol mimpoopori dilo’ ponorikohon di Tan Sri David Wong Dak Wah, bagas Luguan Hakim Sabah om Sarawak, nogi’ nosompuru di tokoh ngaawi’ koundangan nointutunan miagal dii Datuk Daniel Tan Jwee Peng, Dr. David Fung Yin Kee, Datuk John Sikayun, Datuk Roger Chin Ken Fong om Shakinur Ain Karama.
“Pinonuridongan SLRAC diti kopokito tinopot GRS montok papatantu’ undang-undang pogun lobi katalang, kiwaya’, aadang om ksoudong di kogugunoon maso-maso,” ka disio.
Pinosotol disio do kosimbanon undang-undang om kotinanan i pinoindalan do GRS kopokito tinopot piomungand ilo’ id kopogowitan kosimbanon agayo kumaa rayat Sabah.
“GRS okon ko’ papasasad nopo do batos, nga’ popoindalan kosimbanon miampai ponginsomokan kohunung om kobulun,” ka disio.
