Dr. Joachim Gunsalam
KOTA KINABALU: Parti Bersatu Sabah (PBS) pinoposotol kawagu tonggungan dau kumaa kaadangon pulitik om pisompuruan id nayatan parti nokoiyonon, miampai minongomi piomungan Gabungan Rakyat Sabah (GRS) sabaagi impohon bobos kitonggungan om kiwaya’ montok komogoton po’ompus pogun diti.
Ponowoli Presiden PBS, Datuk Seri Dr. Joachim Gunsalam minoboros, parti dilo’ kakal ogirot miampai kotumbayaan do maya’ nopo do kaadangon om pisokodungan, kaanu Sabah monigampot kosunion po’ompus om nogi’ mongigit ‘autonomi’ dau id Pisompuruan Malaysia.
“Id tangaanga’ kinosimbanon pongirusan pulitik, PBS pointatap kiningkakaton do GRS nopo nga’ poimpahan di kopunong montok rayat Sabah misompuru id siriba’ dilo’,” ka disio id kointalangan di tadau baino’.
Minoboros isio, poompus toun nakatalib, koporintaan i buruanon do GRS nokoposurat naangayan agayo – kaampai pinonguludan ‘fiskal’ di lobi kogirot nogi’ kinomogoton lobi kosiau id kinopoindalanan Pibatosan Malaysia 1963 (MA63).
“Maya’ piuhupan oulud miampai koporintaan Pisompuruan om Pakatan Harapan (PH), Sabah nakaramit koiyonon fiskal di lobi kosinggawa’, kopoobian bajet di lobi kagayo nogi’ kopusohon di osonong kopio kumaa koguguunoon koburuon pogun. Rontob kopoindalanan MA63 do noondo agayo kinoburuon om kosikap ko’ mantad pomorintaan nokopogulu,” ka disio pinopointalang.
Dr. Joachim minoboros, kaadangon id siriba’ GRS nakapasaga’ koporintaan pogun moningkanan kumaa koponsolon kopio miagal koburuon ikonomi, kinoinsawaton asil pogun nogi’ kopogirotan rizab kousinan montok koundaran sinakagon obontol.
“Piuhupan tokou miampai koporintaan Pisompuruan okon ko’ kalatahanan, nga’ mimpau do kopurimanan mamantang om piilangan di sopigonop-gonop. Aiso’ kasampalagan id pitorinaan Sabah; nga’, i nopo turidongon tokou nga’ piromutan olidas i poposuul kasasanangan rayat om outonomi pogun,” ka disio pinoposotol.
Sabaagi parti nokoiyonon bobos otuo id Sabah, minoboros isio, PBS nakawaya’ mogisusuai timpu pulitik – nokotoguang kinosusaon, minamaramit kinalantaion om minsingilo mogisusuai nawawaya’an i monginggirot tonggungan parti kumaa rayat.
“Nokoinsingilo yahai do ‘konfrantasi’ okodou amu’ koowit komogoton. I nopo koponimbuat do Sabah kumaa rontob lobi kasawat nga’ pirundingan nosukod, pibabarasan abaal om piuhupan otulid ginawo id pialatan oinsanan bohogian di otootopot mongupus pogun diti,” ka disio.
Dr. Joachim nga’ minokianu nogi’ oinsanan rayat Sabah om mononokodung PBS do tumilombus misompuru om monokodung koporintaan GRS i “nokopokito kinotulidon om asil dau.”
“Oinsanan tokou manahak mandat di ogirot om kotumbayaan kumaa GRS id pomilian agayo pogun do obontol mooi do visi Sabah di otunda’, kibantug om kopimpoopori aanu kotilombus monginggirot,” ka disio.
