KOTA KINABALU: North Borneo Rainforest Festival (NBRF) koguli’ miampai edisi sompomogunan ki’uhu “Pisompuruan” montok mamaramai tungkusan, koubasanan om linumis sandad posorili’ Borneo.
Festival diti kapanau do 11 om 12tw Kohopod 2025 id Koisaan Cultural Village (KDCA), Penampang.
Uhu toun diti poposotol sunduan pisompuruan mogigiyon maya’ seni, koubasanan om sandad posorili’, koposili NBRF sabaagi koiyonon i kopohompit ngaawi’ montok mogigiyon tumimung, miolon pomusarahan om mamaramai tungkusan Borneo id sunduk doun kaawagu.
Montok edisi diti baino’, NBRF 2025 minamaramit turu’ tinonudan tulun sandad mantad Taiwan – Pinuyumayan, Bunun, Paiwan, Tsou, Kebalan, Pangcah om Seediq – i koponginggumu’ do pilumaagan misulak koubasanan nayatan mogigiyon nokoiyonon om sompomogunan.
Festival diti kopokito apat segmen agayo, ilo’ nopo Pokikiranan Pisompuruan, Pokikitanan Koubasanan (Cultural Showcase), Ababayan Sinasawat, om Ababayan Komuniti.
Wookon pongimbayat agayo toun diti nopo nga’ “Populi” di tinimungan Gonding Gen – iso’ ‘ritual’ koubasanan i modingkatalup om tomposion kawagu montok kumoinsan nogi’ id NBRF. Ababayan diti kapanau do ko 12tw Kohopod 2025, jaam ko 6 sodopon, mimpuun id wawaya’an sumuang Koisaan Cultural Village om ahakon di ‘aktivis’ koubasanan Adrian Soidi, monunuridong tinimungan Gonding Gen.
Kiginumu’ 12 walai koubasanan id Koisaan Cultural Village maan tomposio’ sabaagi ‘mini muzium interaktir’, popokito seni, tungkusan om piromutan tulun nogi’ sandad.
Wookon pokikitanan koimbayat kaampai no:
Walai Papar (SAFODA): Kaparagatan ‘Create Your Own Mini Forest’ miampai 200 set ‘terrarium’ kirontob om ababayan ‘adopt a tree’.
Walai Papar (PACOS Trust & Koisaan Bobolian Sabah): Pokikitsanan Bundusan: ‘The Forgotten Mat’ nogi’ babarang obitua Bobolian.
Walai Rungus (Ansamung): ‘Unfolding the Cultural Identity of the Rungus Tribe’ kopokito pokikitanan om kopokitanan tinunturu’ (kraft).
Walai Tenom (Mira Hector & Mitchrons): Papak – pokikitanan seni simpapak koubasanan om rati koubasanan id tirung do ‘corak’ dau.
Walai Kota Belud (Pison): Ropuhan di Tanak Wagu – popointutun seni nansakan koubasanan om kinoubasanan ‘kulinari’ nokoiyonon.
Nuludan pokikitanan NBRF 2025 kopuli do pogiomungan artis nokoiyonon om sompomogunan kaampai DJ Morestyles (United Kingdom), Bung Jae (Brunei), Mathew Ngau (Sarawak), nogi’ artis Sabah miagal di Aki Yutam Miki, George Albert Nuli, Rolou Pomogunan, om RINDUOG (AkiEto & Iko Teguh).
Suai dilo’, ababayan pinotomod “Voice of the Rainforest” kopokito pokikitanan kakamot tuunion miagal suling todung Urali, bungkau, sompoton om sape, nogi’ sinding obitua Pasibutbut di tinimungan Bunun om Taiwan.
Sinasawat agayo Pisompuruan id Walai Murut kosili rubpuon do sodop 11tw om 12tw Kohopod miampai pokikitanan koubasanan sompomogunan om nokoiyonon.
Suai dilo’, Tamu Pisompuruan om Tamu Keusahawanan Kita-Kita kopotimung lobi 80 vendor popokito tinunturu’, takanon koubasanan om produk kousahawanan nokoiyonon.
Pohoroon nogi’ Konsert A-Bayu Rockmantis 2.0 id Lintuhun KDCA do ko 11tw Kohopod – iso’ pokikitanan muzik piomungan pinotomod i kapaamung do koyuon doun kaawagu om koubasanan.
Ka do manganganjur, NBRF 2025 kituduan manampasi kawagu sunduan talun rasam maya’ tuni, seni om kogompitan mogigiyon. Tikid kopokitanan om pokikitanan kosili sunsuyon id nayatan sinakagon id kapamantangan kinomiloon komolohingan om ‘kreativiti’ diti noondo.
Gatang tiket id piromutan nopo:
1-Day Pass: Nosukod RM5 | Komulakan RM3
2-Day Pass: Nosukod RM8 | Komulakan RM5
Sumuang nopo nga’ piri montok tanak-anak id siriba’ 11 toun om tulun nolohing 60 toun poingkawas.
Tulun ginumuan kapaganu tiket maya’ kod QR id poster pinotomod toi laman media sosial pinotomod NBRF id Intagram, Facebook om TikTok.
