Hajiji minoboros montok kopongunggaran DUN Sabah di tadau baino’.
KOTA KINABALU: Lintuhun Undangan Pogun (DUN) Sabah ko-16 miampai pohimagon minaan unggaro’ di tadau baino’, mongukab waya’an kumaa Pomilian Agayo Pogun Ko-17 (PRN17).
Boyoon Montiri, Datuk Seri Haji Hajiji Haji Noor minoboros, ruminuba’ isio di Molohingon Agayo Pogun, Tun (Dr) Musa Haji Aman di kosuabon baino’ montok minamason kopongunggaran DUN dilo’ tu’ timpu limo toun modingkopupusan.
“Miampai kasagaan di Molohingon Agayo Pogun, Lintuhun Undangan Pogun Sabah ko-16 minaan unggaro’ poinggirotkuasa’ do tadau baino’, tadau Koiso’, 6tw Kohopod 2025. Kopongunggaran diti kopongukab waya’an kumaa Pomilian Agayo Pogun ko-17, manahak kuasa’ kumaa rayat Sabah montok popoindalan tonggungan demokrasi diolo’ id kopomilian koporintaan i momorinta’ pogun diti,” ka disio id kapahabaran media doid Menara Kinabalu, di sodopon baino’.
Hajiji minoboros, kootusan dilo’ kopokito tonggungan ogirot koporintaan kumaa nubasanan demokrasi om koindalanon koundangan.
“Po’ompus limo toun nakatalib, minonotos yahai kumaraja’ amu’ monutun hinuyan montok mogowit kosimbanon om komogoton di kirati kumaa pogun om nogi’ rayat,” ka disio i minongoput do koporintaan pinoposiau kosimbanon Sabah maya’ Palan Koburuon Sondikoton Sabah Maju Jaya (SMJ) di poinpuli om kopotonggoi ngaawi’ pointonod minonowoli pomorintaan di wulan Kosiam 2020.
Ka disio, pamalanan Sondikoton SMJ i mimpau tolu tingkananon agayo – Pomutanaman, Pomorunan om Ponombuluyan; Modal Insan om Kasasanangan Rayat; nogi’ Koburuon Infrastruktur om Kopomogompian Otomou – nokopokito naangayan dau di atalang id pototongkop pogun.
Minoboros isio, pomorintaan dau nga’ minaganu laang kobulun om kitonggungan montok minonoibau kobolingkahangan ngaawi’ notungkusan di alaid no do noundarangan, kosuul no id kapangabaan waig, lotirik om kogogonopan.
“Laang ogirot nogi’ kinopoindalanan projik agayo masaan poindalan montok manalasai tongo’ kaantaban notungkusan diti i nokoponginggorit rayat do solinaid diti. Wookon inggisaman nopongo pinopoindalan, naamot i suai masaan poindalan miampai osonong kumaa fasa panalasaian,” ka disio.
Po’ompus penggal maso-maso, ikonomi Sabah nokoinggirot, kopoopuan wagu naanu minogowit sumuang montok mongimbulai kosiwatan pakarajaan, om kasasanangan sosial nogi balajaran mogigiyon id pototongkod pogun nga’ pinoingkawas.
“Naangayan diti naanu minonigampot mantad no do kotumbayaan, sokodung om piupakatan rayat kumaa ‘visi’ oinsanan montok monuridong Sabah di lobi kosonong,” ka disio.
Pinosotol disio, sundung ogumu’ kinomogoton di nosigampot, inggisaman popoburu’ pogun kakal amu’ po nopongo poinponu’.
“Kaantaban wagu monugat panasalaian kobulun, om poinsodia’ yahai do momuruan Sabah kumaa fasa potilombus. Soira’ nopupusan penggal diti, mokianu yahai mandat wagu mantad rayat montok monilombus komogoton di notimpuunan tokou – monuridong Sabah di lobi kogirot, koburu’ om misompuru montok toinsanan,” ka disio.
Hajiji pinopolombus nogi’ kalansanan mooi kootusan pomilian agayo obontol koponginggirot rolou rayat mamajamin kaadangon nogi’ koumoligan pogun, om papatantu’ komogoton di po’ompus montok Sabah.
“Kanou tokou toinsanan lumaang kumaa toguang miampai kotumbayaan om angkab,” ka disio.
