Joniston Bangkuai
KIULU: Kinosunsurianan Parti Solidariti Tanah Airku (STAR) om Parti Maju Sabah (SAPP) mantad Gabungan Rakyat Sabah (GRS) amu’ apatut do kopongumpadan inggisaman po’ompus piomungan dilo’ do monugat kawagu kopotutan Sabah, ka di Puru Lintuhun Undangan Pogun (ADUN) Kiulu, Datuk Joniston Bangkuai.
Joniston po nogi’ Luguan Kopointalangan GRS om Parti Bersatu Sabah (PBS) minoboros, sundung STAR om SAPP okon nodi ko’ somboogian mantad GRS, goduduo parti dilo’ kakal miilang pomusarahan o ninggisaman di miagal kaagal di ontok pinonuridongan piomungan dilo’.
“Koduo nopo, STAR om SAPP nopo wookon bohogian i pinapapanau tonggungan oponsol id pinonuridongan GRS, om otumbayaan oku kakal diolo’ mogowit ‘DNA’ GRS,” ka disio id ramai sopisuau miampai rayat id Kampung Tomis Jaya, do hiti, konihab.
Kalansanan disio goduduo parti dilo’ tumilombus monokodung inggisaman manamong kopotutan om koponsolon Sabah sundung pia id labus do piomungan dilo’.
Joniston minoboros, koponguludan pulitik pikikiro kosimban, nga’ sondikoton oinsanan montok manamong ‘autonomi’ om koburuon Sabah nuru’ kotilombus kosili ponompuru kumaa parti ngaawi’ nokoiyonon.
Pinoposorou isio do PBS nokoumbal minomorinta’ pogun mantad toun 1085 gisom 1994 ogumu’ nopinsingilaan karait koponsolon piuhupan id kopomususan kopotutan Sabah.
“Toun-toun dilo’ minonuduk dati’ do momusus kopotutan Sabah okon ko’ iso’ i asanang. Nuru’ tokou maganu pontudukan mantad nawawaya’an dilo’ ontok potimbaba’ koyuon pulitik noondo,” ka disio.
Mantad po nogi’ do nawawaya’an dilo’, ka di Joniston, atalang do kasahapan nopo tomod nga’ amu’ kapanalasai kobolingkahangan, nga’ mantad pirundingan om pihunungan sasaru’ kopongukab lobi kogumu’ kosiwatan komogoton montok Sabah.
Id sunduk diti, pinointalang disio do pisokodungan miampai koporintaan Pisompuruan nuru’ intangan sabaagi iso’ piilangan kosudong i kapasaga’ Sabah popoburu’ do kopotutan dau maya’ pibarasan om kogompitan oulud.
“I nopo maan tokou nga’ ponginsomokan di kohunung – i potuu maya’ do pogibabarasan toi pirundingan – asal po do kouhup dati’ mogihum asil di kirati montok Sabah.
“Miuhup oronit miampai koporintaan longkod amu’ nuru’ intangan sabaagi tumiduku’ kumaa Putrajaya, nga’ iso’ inggisaman kohunung montok mokianu kawagu kopotutan tokou,” ka disio.
