Hajiji pinapatahak ‘replika’ kunci Rumah Mesra SMJ kuminaa mamaramit di kosudong id Ababayan Sumungkad Projik Pomuwalaian om Lot Komersil Kotinanan Koburuon Pomuwalaian om Kakadayan (LPPB) id Kampung Taka, Pitas, doid luan Lintuhun Mogigiyon Watas Pitas di konihab.
PITAS: Boyoon Montiri, Datuk Seri Haji Hajiji Haji Noor pinapahabar pomoruhangan 10 unit Rumah Mesra Sabah Maju Jaya (SMJ) id tikid koiyonon Lintuhun Undangan Pogun (DUN) potomodon montok komulakan i wagu ponuridong kolominan mimpuun toun tiso’.
Minoboros isio, miampai pomoruhangan dilo’, kiginumu’ 50 unit Rumah Mesra SMJ maan waalo’ id tikid koiyonon DUN nung piadangon di 40 unit do toun diti.
“Di gulu haro apat toi limo no tinan walai PPRT (Projik Pomuwalaian Rakyat Termiskin), nga’ toun diti minonuridong tokou 40 tinan Rumah Mesra SMJ om toun tiso’, ruhangan tokou sumili 50 unit id tikid DUN montok rayat i momoguno.
“Pomoruhangan 10 unit dilo’ potomodon montok sukod wagu di osusa’ om kasasawo tu’ oilaan tokou ogumu’ i kakal poingiyon miampai paganakan,” ka disio ontok pinopoimagon Ababayan Sumungkad Projik Pomuwalaian om Kadai Kotinanan Koburuon Pomuwalaian om Kakadayan (LPPB) Kampung Taka, do hiti, di konihab.
Hajiji minoboros, projik pomuwalaian om kadai LPPB id Kampung Taka pikikiro kapanahak waya’ agayo kumaa mogigiyon nokoiyonon miampai koposodia’ kosiwatan pakarajaan nogi’ koiyonon kopongindopuan wagu, suai ko’ manahak koundaran kumaa oinsanan mogigiyon.
“Bobos oponsol, projik diti kapanahak kosiwatan kumaa rayat sumanganu walai sondiri, potilombus dino kopokito tinopot, kinotulidon ginawo om kopusohon koporintaan id kopoburuan koiyonon labus kakadayan,” ka disio.
Hajiji pinapatahak garan tana’ kuminaa mongongobi’ mogigiyon kampung id Ababayan Sumungkad Projik Pomuwalaian om Lot Komersil Kotinanan Koburuon Pomuwalaian om Kakadayan (LPPB) id Kampung Taka, Pitas, doid luan Lintuhun Mogigiyon Watas Pitas di konihab.
Tumanud disio, projik dilo’ kopohompit ponuridongan 320 unit walai, kapaampai mantad walai miapid iso tingkat om walai teres iso tingkat, id tana’ kiginayo 37.60 ekasr pasanganu LPPB. Kopohompit po nogi ilo’ do 171 unit kadai i kapaamapi mantad unit duo tingkat, superstore, showroom om kiosk.
“Kalansanan ku projik piuhupan koporintaan om swasta diti aanu popoindalan miampai oulud, tumanud timpu nakatantu’ nogi’ kopunong pinibatosan di nokopikogos montok monumboyo’ kogugunoon mogigiyon.
“Kararalano’ piuhupan koporintaan-swasta diti okon nopo kopongingkuri’ tonggungan kousinan koporintan, nga kapasaga’ intodonon koporintaan potingkananon kumaa koburuon sosioikonomi om kogogonopan suai montok kasasanangan rayat,” ka disio.
Hajiji pinoposotol, koprintaan pogun amu’ insan popoinsian koburuon nombo-nombo watas, kaampai Pitas, i pointonod limo toun nakatalib nakaramit mogisusuai projik koburuon montok popogoris komogoton nokoiyonon.
Id ababayan dilo’, pinapahabar nogi’ isio kinopolulusan ponuridongan mini kompleks sipoot Pitas, terminal bas ginumuan kigatang RM1 eiong, nogi’ walai koubasanan id Dataran Pitas miampai kos RM1.4 riong.
Suai dilo’, i Boyoon Montiri minanahak jominan do projik pomogompian gipan i notingkadan pogulu diti – mantad piuhupan Yayasan Sabah om songinan komponi – maan papanaho’ kawagu montok mongimbulai kosiwatan pakarajaan nogi’ poposikap ikonomi rayat Pitas.
Minoboros nogi’ isio, koporintaan pogun miboros miampai SAFODA karait songkinoiyonon tana’ i nupalai do rayat montok polobuson mantad watas kotinanan dilo’ id watas nokomoi.
Id ramai miagal, i Hajiji pinapatahak 468 garan tana’ kopohompit ginayo 1,273.432 hektar kumaa tongo’ mamaramit, kaampai 228 garan id siriba’ Ababayan Ponukatan Tana’ Mamasok Pogun Sabah (PANTAS) kiginayo 863.735 hektar, 239 garan pongupalaian tana’ (NT) kiginayo 406.11 hektar, nogi’ iso’ garan kosumpakon Balai Pulis Pitas kiginayo 3.587 hektar.
