Haji Hajiji Haji Noor
KOTA KINABALU: Boyoon Montiri, Datuk Seri Haji Hajiji Haji Noor lumansan rayat Sabah, kaampai mogigiyon Cina, tumilombus manahak sokodung kumaa koporintaan pogun di poinharo mantad id inggisaman popoburu’ pogun diti.
“Koporintaan pogun noondo tumilombus poposiau koburuon tu’ nosili tonggungan dahai do manahak di bobos osonong kumaa rayat,” ka disio id Ramai Pesta Tanglung 2025 doid Putra Ballroom, Bukit Padang, do hiti di kosodop. Boboroson disio binasa’ di Montiri Ponombuluyan, Koubasanan om Sandad Posorili’, Datuk Seri Christina Liew.
Hajiji minoboros, koporintaan pogun mamagatang kopio kinouhupan nogi’ tinonggungan mogigiyon Cina id kinoponguhupan pinopoburu’ pogun.
“Mantad dilo’, kanou tokou no tumilombus momogompi’ om monginggirot pisompuruan diti om poposili Sabah ombitanan poingkuro kopogisusuaian kaanu silihon ginoris i koponompuru dati’ koinsanai.
“Id sunduan kaparamaian diti, kanou tokou no monginwagu tonggungan do miuhup montok komogoton Sabah,” ka disio.
Pinosotol nogi’ disio, Sabah nopo nga’ poombitanan osonong montok Malaysia id kopomogompian pogiuludan mogisuai tinaru.
“Miampai lobi 30 tinimungan etnik, poinpasi tokou id koyuon di sopipantang. Kopogisusuaian nopo diti nga’ iso’ koundaran i nokoposili Sabah otootopot do poinsuul. Piuludan di popuriman tokou okon ko’ naantakan tomod nopo, nga’ mantad no do sunduan kopogiagalan, pogitimbangan om pogipapantangan do tikid rayat Sabah.
“Sunduan diti atalang okito soira’ dati’ mamaramai mogisusuai kararamaian oinsanan miagal Toun Wagu Sina, Pesta Tanglung, Tadau Raya Aidilfitri, Ramai Kaamatan om Krismas.
“Mantad dilo’, kopogisusuaian koubasanan i pasanganu dati’ doid Sabah diti mositi’ no do ramaion do oinsanan, amu’ momuntuk tinaru toi ugama’. Kopogisusuaian diti, kaampai karamaian miagal Pesta Tanglung, nokoponompuru rayat pgoun diti montok poinparo otoronong om oulud. Iti no kinolumison om ginirot Sabah,” ka disio.
Hajiji minanahak jominan do koporintaan pogun tumilombus patanom pisompuruan maya’ mogisusuai kaparagatan om inggisaman, nga’ inggisaman diti momoguno sokodung oinsanan bohogian kaampai tinan okon koporintaan nogi’ momuruan mogigiyon.
“Mantad dilo’, kalansanan ku rayat pogun diti kotilombus misompuru om amu’ obingampawong di susuyan aiso’ nimpohon i patayadon do bohogian aiso’ tinonggungan,” ka disio.
Boyoon Montiri dilo’ minoboros nogi’, koporintaan pogun pinopoindalan mogisusuai ababayan montok mongingkawas ikonomi rayat om pogun.
“Suai dilo’, kaganaan suai miagal do balajaran, koburuon modal insan om kasasanangan rayat nga’ nosili nogi’ do wookon posuulon do koporintaan pogun.
“Kopuriman tokou do kakal haro kaantaban i nuru’ soibahan, kaampai no kobolingkahangan i notungkusan mantad kopomorintaan nokopogulu, miagla pangaba’ waig om lotirik.
“Nga’, koporintaan noondo diti tumilombus minggisom manalasai kobolingkahangan ngaawi’ diti maya’ palan timpu anaru om oniba’. Bobos oponsol nopo sokodung rayat mooi do Sabah kotilombus kotunda’ id Malaysia,” ka disio.
