Anwar Ibrahim ontok jelajah Himpunan Temu Rapat Umum kopihondot 27 Toun Reformasi di songkosodop id Sandakan, Sabah.-Facebook Anwar Ibrahim.
PETALING JAYA: Luguan Montiri, Datuk Seri Anwar Ibrahim pinapahabar timpohon Parlimen id Sabah om Sarawak maan ruhangai.
Tumanud Utusan Malaysia, minoboros isio, ilo’ nosusuhut di pinibarasan karait haal dilo’ ontok mitingan kopohompit Pibatosan Malaysia 1963, goduduo pogun dilo’ minokianu ponimbangan mooi tintob timpohon Parlimen ruhangan.
“Montok kumoinsan pointonod 1963, Anwar i noondo diti nosili Luguan Montiri papahabar timpohon Parlimen montok Sabah om Sarawak maan ruhangai,” ka disio.
Minoboros isio dilo’ ontok minoboros id Ababayan Rapat Umum om Himpunan Keadilan kopihondot 27 toun Reformasi, id Lintuhun Poingukab Ginumuan Merotai Besar, di konihab.
Sarawak kiharo 31 timpohon Parlimen, naamot Sabah pasanganu 25 timpohon. Goduduo pogun Borneo dilo’ mongobi’ 25 pihatus mantad 222 timpohon Parlimen.
Pogulu diti, haro atag monimban ginumu’ timpohon Parlimen montok momogonop kuota iso’ pitolu toi 35 pihatus mongobi’ Sabah om Sarawak.
