Aksyah Haji Nasrah
KOTA KINABALU: Atag Boyoon Montiri, Datuk Seri Haji Hajiji Haji Noor montok poposili songulun Kumoduo Boyoon Montiri (TKM) mantad mogigiyon Tionghua komoyon sabaagi laang kohunung, ‘inklusif’ nogi’ kaanu monginggirot kaadangon pulitik Sabah.
Bagas Kumoduo Luguan Tinan Momuruan Pogun BERSATU Sabah, Aksyah Haji Nasrah minoboros, atag dilo’ okon ko’ ‘retorik’ pulitik, nga’ iso’ ‘formula’ oponsol montok mongingkikip piwolitan pisuayan sosiopulitik id pogun diti.
“Iti okon ko’ karait do parti nopo. Ilo’ laang impohon montok monginggirot pisompuruan om popokito kopongokunan kumaa mogigiyhon Tionghua sabaagi wookon mantad tukod koburuon Sabah,” ka disio id kointalangan di tadau baino’.
Aksyah pinoposotol mogigiyon Cina id Sabah kiharo kosuulon di poinpoopori tu’ noobian di ogumu’ parti pulitik nung paagalon di pogun suai.
Kohondot dilo’, ka disio, apatut yolo’ simbuaton miampai karaja’ kitopong TKM montok mamajamin kopongobian di aadang.
Komoyon po nogi’ disio laang di Hajiji dilo’ sabaagi sopisuai di gaya’ kopomuruanan parti pembangkang i komoyon disio amu’ mamantang om mangakun do mogigiyon Tionghua.
“Haro lansanon pembangkang momoguno pongundadait di amu’ apatut kumaa tinaru Cina id Sabah. Nogi’, haro I miampai poingukab magada’ atag poposili TKM mantad tinaru Tionghua. Iti atalang kopokito pulitik okikip om ‘rasis’ i kopomorugi’ do Sabah,” ka disio.
I Aksyah minokianu nogi’ mogigiyon Tionghua manahak sokodung ouli’ kumaa Gabungan Rakyat Sabah (GRS)-PH id Pomilian Agayo Pogun ko-17 (PRN17).
Otumbayaan isio mandat agayo kapanahak kosiwatan kumaa koporintaan buruanon di Hajiji tumilombus poposimbuat okon nopo ko’ nindikohon mogigiyon Tionghua, nga nogi’ bantug Sabah sabaagi pogun i otoronong, otunda’ om ounsikou.
“Hajiji om GRS mangakun mogigiyon Tionghua sabaagi mongunguhup agayo pulitik, ikonomi om koburuon Sabah. Om nogi’, koporintaan pogun nokopokito no do kopongokunan dilo’ miampai minomoruhang kopoobian montok balajaran nogi’ kaparagatan sosiokoubasanan mogigiyon Tionghua,” ka disio.
I Aksyah pinoposotol, kaadangon pulitik Sabah aanu no do momusus maya’ pisompuruan ogirot nayatan oinsanan tinaru, potilombus magada’ pulitik pibabakan i amu’ koowit koundaran kumaa rayat.
