Anwar miniboros miampai di Hajiji pogulu mitingan MTPMA63 nokotimpuun id Kompleks Satria Pertiwi, Kuching di tadau baino’. Okito nogi’ i Abang Johari (koduo,wanan) om Kumoduo Luguan Montiri Datuk Seri Fadillah Yusof (wanan).
KUCHING: Sabah minongulingad pipiro haal kaampai kopomoruhangan timpohon Parlimen montok pogun dilo’ id mitingan Kounsol Karaja’ Kopoindalanan Pibatosan Malaysia 1963 (MTPMA63) i pinonorikohon di Luguan Montiri, Datuk Seri Anwar Ibrahim do hiti di tadau baino’.
Boyoon Montiri, Datuk Seri Haji Hajiji Haji Noor minoboros, mitingan dilo’ nakapanau id koyuon di osuau i minongukab kosiwatan montok pibabarasan potilombus.
Minoboros isio, Sabah mokianu lobi kogumu’ timpohon Parlimen pohoroon id pogun dilo’ kopiongoi di sunduan MA63 nogi’ monginggirot koponsolon pogun om rayat dau.
“Miampai prinsip dilo’, Luguan Montiri kaakun nga’ haal diti nuru’ pibabarasan miampai osorisid id nayatan teknikal tu’ kopohompit ilo’ ponimbanan Koundangan Pisompuruan.
“Iti no sabab do piromutan osonong id pialatan koporintaan pogun om Pisompuruan oponsol kopio,” ka disio katalib mitingan id Kompleks Satria Pertiwi do hiti.
Haal suai i nulingad nopo nga’ mooi do siktor ponombuluyan pouludon id nuludan miampai, i po nogi’ owiton kumaa puruankuasa teknikal montok pogibabarasan.
Tinonudan Sabah kapaampai di tongo’ Kumoduo Boyoon Montiri – Datuk Seri Dr. Jeffrey Kitingan, Datuk Seri Dr. Joachim Gunsalam om Datuk Ir. Shahelmey Yahya; Montiri Kousinan, Datuk Seri Masidi Manjun; Montiri Sains, Tiknologi om Inovasi, Datuk Dr. Mohd. Arifin Mohd. Arif; Montiri Ponombuluyan, Koubasanan om Sandad Posorili’, Datuk Seri Christina Liew; Montiri Koburuon Mogigiyon om Kasasanangan Rayat, Datuk James Ratib om nogi’ i Monunurat Koporintaan Pogun, Datuk Seri Sr. Safar Untong.
Daamot dilo’, i Hajiji minamaramit po nogi’ kinopoimpuunan projik Ralan Popiromut Sabah-Sarawak Fasa 2 (SSLR 2) kigatang RM7.6 bilion di tadau baino’ i kapananda’ laang agayo id kopoingkawasan kopiromuton pialatan duo pogun bobos agayo id Malaysia.
Minoboros isio, projik dio’ okon nopo ko’ oponsol id kopoinggirotan kopiromuton id pialatan do Sabah om Sarawak nga nogi’ kapapanau tonggungan agayo id kopongunsuban kosunion ikonomi maya’ pidagangan om ponombuluyan.
Tinonudan Sarawak binuruan di Premier Tan Sri (Dr.) Abang Haji Abdul Rahman Zohari Tun Abang Haji Openg.
