Haji Hajiji Haji Noor
KOTA KINABALU: Boyoon Montiri, Datuk Seri Haji Hajiji Haji Noor minonuhu’ koinsanai Puruankuasa’ Ponguludan Kadaat Watas (JPBD) poguraon misondikot, kosuul no id koiyonon di asaru’ aantakan liyud, nosusuhut koyuon tawan i amu’ atantu’ noondo diti.
Ka disio, laang osikap dilo’ oponsol montok papatantu’ kososodia’on id rontob akawas, suai ko’ posikap kopogiuludan karaja’ nayatan kotinanan koumoligan, koupisan teknikal om nogi’ bohogian kikuasa’ nokoiyonon id koponoguangan nunu-nunu kopikikiraan kadaaton sandad.
“Miampai kopoguraan JPBD, nunu-nunu koyuon ponguhupan aanu popogura’ lobi kotimpas, kaampai karaja’ ngaawi’ koponomposian, kopoundolihan di nohompitan om koposodiaan koguugunoon id longkod poundolihan naamot,” ka disio id kointalangan, di tadau baino’.
I hajiji pinoposorou nogi’ do mogigiyon mooi toririmo osoding di kopoingatan koyuon tawan i polobuson Koupisan Meteorologi Malaysia nogi’ mananud ponuhuan bohogian kikuasa’ montok mongilag nunu-nunu kaantakan i kopomidsala’ koumoligan.
“Koporintaan pogun opoduli’ kopio di koyuon liyud om tana’ notuhan di naantakan.
“Nosuhu’ ku no oinsanan JPBD mooi do poguraon poinponu’ mooi do tikid laang aanu mongulud om rayat di noumpadanan kaanu pongumoligan nogi’ ponguhupan di poinpatut,” ka disio pinoposotol.
Sekretariat Puruankuasa’ Ponguludan Kadaaton Pogun (JPBN) Sabah pinopoilo, gisom jaam ko 12 pitanga’adau baino’, 379 nogompitan mantad 123 pagakanan pinoundaliu kuminaa pipiro longkod poundolihan naamot (PPS) id Beaufort om Penampang.
Id Beaufort, 149 nogompitan mantad 53 paganakan noondo diti pinoiyon id PPS Selagon.
Naamot dilo’, id Penampang, 230 nogompitan mantad 70 paganakan pinoundaliu kuminaa tolu PPS ilo’ nopo nga’ Kompleks Sipoot Penampang (83 tulun), SK St. Paul Kolopis (50 tulun) om Lintuhun Huguan Siou (97 tulun).
Miampai koinsanai, ginumu’ nogompitan id PPS kopohompit 127 kusai nosukod kaampai tulun nolohing, 139 koonduan nosukod om nolohing, naamot i nopo noolu’ nga’ 113 kapaampai tanak-anak om bagang.
Daamot dilo’, minamason i Hajiji di mogigiyon id koiyonon haro ‘risiko’ do mingat-ingat diti gompus om sumikap mundaliu soira’ suhuon do bohogian kikuasa’.
“Kada’ paganu risiko id koiyonon di kopoligogon. Koumoligan paganakan mositi’ posuulon. Koporintaan papatantu’ ponguhupan takanon, ‘logistik’ om kogogonopan suai kotilombus patahakon kumaa koinsanai nogompitan,” ka disio.
Id haal suai, Koupisan Bomba om Manampasi Malaysia (JBPM) Sabah pinopoimagon naantakan tana’ notuhan i nokountun songinan walai duo tingkat id Kampung Sarapung, Penampang kikiro jaam ko 6.10 sodopon konihab.
Tumanud ruputan, haro duo nohompitan id kinaantakan dilo’. Songulun tondu’ tinampasi tulun ginumuan miampai kosindualan di au’ adalaan, naamot songulun kusai kiumur 97 toun kakal ihumon ontok sinurat habar diti.
