Hajiji pinopowonsoi ‘gimik’ kinopoimaganan.
KOTA KINABALU: Boyoon Montiri, Datuk Seri Haji Hajiji Haji Noor pinoposotol do tinonggungan, kabaalon om kopulokison id kopoindalan watas kosili kunci agayo montok papatantu’ katatapan koporintaan pogun otootopot kapanahak waya’ osonong kumaa rayat nogi’ papalantoi ababayan koburuon Sondikoton Sabah Maju Jaya (SMJ).
Minoboros isio, upisor watas om monguhup upisor watas nopo nga’ lansanon id siriba’ i kitonggungan sabaagi popiromut oponsol pialatan koporintaan om rayat.
Kohondot dilo’, nuru’ do ‘proaktif’, otulid om osomok do mogigiyon mooi tikid projik koburuon koindalan miampai kiwaya’.
“Pokionuon ku upisor watas okon ko’ manamong nopo tonggungan, nga’ papatantu’ tikid projik koburuon korikot kumaa rayat miampai poinponu’ tinonggungan om kinotulidon. Papasanang pitorinaan rayat om moningkod do koulalaho’ ‘birokrasi’ di kopomidsala’ koburuon watas,” ka disio ontok pinopoimagon Pitimungan Tongo’ Upisor Watas Pogun Sabah Ko-28 id Shangri-La Tanjung Aru do hiti, di tadau baino’.
Hajiji minoboros, kopoindalanan watas do noondo potoguang kaantaban lobi kagayo nosusuhut kopoionuan rayat di nokoingkawas nogi’ kinosimbanon sosioikonomi pomogunan i pinosiau do tiknologi.
“Upisor watas nuru’ mokinongou bohit rayat om papatantu’ kopoindalanan katatapan koporintaan okon nopo ko’ korikot kumaa porikatan, nga kapanahak waya’ mitilombus kumaa koposion diolo’.
“Koporintaan pogun toririmo tumopot papatantu’ koburuon aadas id pialatan kakadayan om labus kakadayan,” ka disio.
Pinoposorou nogi’ isio do tinonggungan om kabaalon nopo nga’ impohon kopoindalanan watas, mantad dilo’ tikid kootusan om laang mositi’ mimpau prinsip kaadangon, kinotulidon om tinonggungan.
Minongomi naangayan koporintaan pogun, ka di Hajiji, Sabah no noondo id solug di ogirot maya’ kinopoindalanan Palan Koburuon Sondikoton SMJ 1.0, kaampai kinalantaion minongingkuri’ rontob komosikinan labus kakadayan.
Ka disio, wookon inggisaman agayo nopo nga’ pinonuridongan Rumah Mesra SMJ, miampai 7,482 unit walai pinolulus pointonod 2022 gisom 2025 om 4,540 unit di nopongo gisom wulan Kowalu’ katatalib.
Ka disio, koporintaan pogun pinopoingkawas nogi’ elaun Ponorikohon Puruankuasa’ Koumoligan om Komogoton Kampung (JKKK) mantad RM500 kuminaa RM800.
Naamot elaun Monunurat JKKK pinoingkawas mantad RM300 kuminaa RM400, sabaagi kopongokunan di tonggungan diolo’ mongulud koburuon om kasasanangan mogigiyon id nayatan kampung.
Minoboros isio, gisom noondo diti, tolu watas okoro’ ilo’ nopo nga’ Paitan, Membakut om Sook pinoingkawas rontob suminili watas poinponu’, naamot pipiro watas okoro’ suai kikosiwatan onuan ningkakaton di miagal nung koponumboyo’ kosudongan pinatantu’.
Minonimbar tototondos pembangkang i kaka do koporintaan pogun amu’ nokoowit kinoburuon, pinosotol di Hajiji do totondos nopo dilo’ nga’ pangakal-akal pulitik nopo montok mogolim naangayan koporintaan.
“Ilo’ nopo nga’ amu’ otopot. Pokionuon ku upisor watas om monguhup upisor watas popoindalan tikid inggisaman koporintaan kumaa rayat mooi do amu’ yolo’ aampawong di totondos aiso’ poimpahan,” ka disio.
Pinoposorou nogi’ isio upisor watas do toririmo sumosodia’ monoguang koyuon tawan amu’ atantu’, kaampai papatantu’ aset om kakamot manampasi id koyuon di osonong.
Hajiji nga’ lumansan Pitimungan Tongo’ Upisor Watas Pogun Sabah Ko-28, kopongimbulai ‘resolusi’ di kohunung montok poindalanon, kopiongoi di uhu “Daerah Maju, Rakyat Sejahtera”, potilombus dino koponigampot angkabon Sabah Maju Jaya.
