Dr. Joachim (koduo, wanan) suminasi’ kinapatahakan geran tana’ id siriba’ Ababayan PANTAS i pinotunui di Hajiji (tanga’) kuminaa songulun mamaramit.
KOTA KINABATANGAN: Ponuridongan Kakadayan Wagu Seri Milian pikikiro kosili longkod kosunion wagu i kaanu papasarok ikonomi kinoiyonon, mongimbayat kopoopuan kohunung nogi’ monginggirot nindikohon Kinabatangan sabaagi rikoton tuumbaya’an oponsol id Sabah.
Kumoduo Boyoon Montiri II po nogi’ Montiri Koporintaan Koiyonon om Pomuwalaian Sabah, Datuk Seri Dr. Joachim Gunsalam minoboros, projik koburuon milongot kiginayo 157.48 ekar dilo’ koindalan sabaagi ‘focal point’ wagu id pialatan tongo’ kakadayan agayo miagal Tawau, Sandakan om Kota Kinabalu.
“Koburuon diti kotondu’ id timpu dau tu’ kaanu ilo’ kosili ponokodung kosunion ikonomi maya’ koposodiaan lot komersial, pomorunan okoro’ om gonsuhatan, nogi’ kosiwatan pakarajaan kumaa mogigiyon koiyonon,” ka disio minoboros id booboroson ponogulu doid Ramai Sumungkad Kakadayan Wagu Seri Milian id Dataran Kakadayan Kota Kinabatangan, di tadau baino’.
Ramai dilo’ pinohimagon di Boyoon Montiri, Datuk Seri Haji Hajiji Haji Noor.
Dr. Joachim (tohuri kaapat, wanan) om i Hajiji (tohuri koonom, gibang) ngoi’ tombului i nokotindapou guminambar pongingitanan miampai tongo’ mamaramit geran tana’ id siriba’ Ababayan PANTAS.
Dr. Joachim minoboros, kinoiyonon kosudong kakadayan wagu dilo’ nga’ kikosiwatan mongimbayat mangangapu’ wagu, kosuul no id ponuridongan linimpu pomorunan i koponokodung pomorunan sawit di poinharo mantad, suai ko’ mongimbayat tutumombului suang om labus pogun do sumongkoduo pogulu monilombus pamanahak kumaa kinoiyonon eko-ponombuluyan pososorili’ watas dilo’.
Pinointalang disio, projik i pinoindalan miampai piniuhupan do Sunmow Construction Sdn. Bhd. minomoguno karalano’ minomowonsoi koyuon, monuridong om mambayar poinponu’, oinggonopan mogisusuai kogogonopan wagu kaampai 58 lot pomorunan agaan miapid 1½ tingkat miampai 200 pisuk, masjid, stisin tumau, longkod kointalnagan ponombuluyan, pasar agayo, linimput futsal, ‘food court’, popokingan poingukab, nogi’ upis wagu Kounsol Watas Kinabatangan.
“Kopoburuan diti kopongingkawas gatang harata’tana’ pososorili’, kopoinggayo kosiwatan pomuhuan asil PBT maya’ sukai tobon, caj surupukaraja’, pomulisinan om siwaan premis. Lobi koponsol, kopomoruhang ilo’ sitok pomuwalaian ogoosan sumanganu kumaa rayat,” ka disio.
Minoboros isio, ponuridongan Kakadayan Wagu Seri Milian nopo iso’ kinosimbuaton koburuon id watas Kinabatangan, i okon nopo ko’ koposimban kokitanan Kakadayan Kota Kinabatangan, nga kosili posiau kumaa kosunion tongo’ kakadayan wagu id koiyonon pososorili’.
“Otumbayaan oku projik diti kosili ponokodung kumaa kopoindalanan om koburuon suai i napalan miampai Kounsol Watas Kinabatangan montok no kasasanangan mogigiyon nokoiyonon, miampai sokodung om kolulusan koporintaan pogun,” ka disio.
Dr. Joachim minongunsikou nogi’ kumaa di Boyoon Montiri, Datuk Seri Haji Hajiji Haji Noor mantad kinopolulusan om sokodung kumaa projik dilo’, nogi’ minonongkounsikou kumaa oinsnaan boogian i nokohompit pinapalantoi ababayan sumungkad dilo’.
Nokotindapou nogi’ Montiri Koburuon Mogigiyon om Kasasanangan Mogigiyon po nogi’ ADUN Sugut Datuk James Ratib; Ponorikohon Kotinanan Koburuon Pomuwalaian om Kakadayan po nogi’ ADUN Kuamut, Datuk Masiung Banah; Monunurat Pointatap KKTP, Datuk Dr. Jamili Nais; Potunud Unit Lansanon Koburuon Mogigiyon (UPPM) Pogun Sabah, Datuk Awang Kadin Tang; Presiden Kounsol Kakadayan Sandakan, Walter Kenson; Ponorikohon Kounsol Watas Kinabatangan, Willey Lampaki om Ponorikohon Manganjur ababayan i po nogi’ Upisor Eksekutif Kounsol Watas Kinabatangan, Zuldahri Hj Tujoh om tongo’ upisor mantad kotinanan koporintaan.
