Haji Hajiji Haji Noor
KOTA KINABALU: Koporintaan pogun miampai sokodung PETRONAS om tambalut pomorunan pinapatatap sondikoton 100 pihatus montok kapanahakan kuntirik karaja’ surupukaraja’ om kakamot ngaawi’ tumau om gas (OGSE) nokoiyonon kumaa tongo’ komponi Sabah toun diti, ka di Boyoon Montiri Datuk Seri Haji Hajiji Haji Noor.
“Mantad sunduk pakarajaan, sondikoton tokou atalang: 100 pihatus karaja’ okon teknikal om sokukuri’ 80 pihatus karaja’ teknikal id siktor OGSE mositi’ suangan do tangaanak Sabah.
“Sondikoton diti kopokito tonggungan ogirot tokou montok monginggirot kogompitan nokoiyonon om momonsoi ekosistem ginoris di ‘tahan lasak’ om ologkus mantad suang pogun,” ka disio id Pitimungan om Pokikitanan Tumau, Gas om Ginoris Sabah Ko-12 id Longkod Konvensyen Sompomogunan Sabah (SICC) do hiti, di tadau baino’.
Boboroson disio binasa’ di Montiri Koburuon Pomorunan om Kopongindopuan, Datuk Phoong Jin Zhe.
Di toun 2021, ka di Hajiji, ginumu’ kuntirik i pinatahak kumaa tongo’ komponi Sabah montok karaja’ surupukaraja’ tumau om gas nokoiyonon kiginumu’ RM341 riong, naamot dumontol koompokon toun nakatalib, ginumu’ dilo’ nokosimbuat nakatalib RM2 bilion montok karaja’ ngaawi’ i pinatahak id suang om labus Sabah.
Minoboros isio, pomorunan tumau om gas Sabah nopo nga’ toruntud kopio kosunion ikonomi pogun diti, om tumilombus papamanau tonggungan oponsol id ikonomi Malaysia, pinopouhup somok 40 pihatus kumaa kopolobusan tumau Malaysia om kikiro 20 pihatus kopolobusan gas.
“Nga’, otumbayaan tokou do tonggungan tokou amu’ apatut do kirontob nopo kumaa kopolobusan tomod. Kiangkab tokou montok poposili Sabah sabaagi longkod kobontugan id inovasi OGSE om momoguno ginoris ogirot nogi’ sabaagi hab kopoopuan, bakat om tiknologi i koponsupu’ gatang timpu anaru,” ka disio.
Kohondot dilo’, ka di Hajiji, koporintaan pogun maya’ SMJ Energy minaganu laang okodou id koonuan koponsolon kosongonuan om aset intonodon om oluyungan di agayo, kaampai no PSC Samarang om loji petrokimia SAMUR, nogi’ koponsolon id blok pongukaban SB403, SB409, SB306A om SB306B.
Ka disio, Sabah Energy Corporation nga’ minonginggirot nogi’ nindikohon dau sabaagi mangangaba’ om momimirangkat gas sandad ‘domestik’ bobos agayo id Malaysia, nosusuhut kinalantaion minonowoli kuntirik gas tindal PETRONAS id Sabah.
“Orohian oku maganu kosiwatan diti montok mongunsikou kumaa PETRONAS om oinsanan tambalut kopoindalnaan dahai id Sabah mantad inggisaman di po’ompus, tonggungan om kopoopuan dokoyu id koburuon suang nokoiyonon.
“Pibatosan Piuhupan Komersial (CCA) i nokopikogos di wulan Kohopod om Duo 2021 miampai PETRONAS nopo nga’ oponsol kopio om kinopoindalanan dilo’ maya’ inggisaman miagal Puruankuasa’ Okoro’ Pomogunan OGSE i piniuhupan monorikohon do Komontirian Koburuon Pomorunan om Kopongindopuan Sabah nogi’ PETRONAS nokopomiuwa’ di atalang.
“Montok monilombus waya’ diti, minonuridong tokou do Kounsol Kandungan Nokoiyonon Sabah id siriba’ pitamangan SMJ Energy nogi’ pinopoindalan Tinimungan Pakakaraja’ Miuhup montok Piilangan Wajib.
“Inggisaman diti, mitonggoi do kointalangan otulid pinosodia’ maya’ ‘Tinjauan Aktiviti Kinabalu’ (KAO), kituduan papatantu’ tongo’ komponi nokoiyonon tokou osunudan, posodia’ om kiharo tambalut miuhup di kosudong montok mamagampot kalantaion,” ka disio.
Hajiji minamarayou do Kounsol Surupukaraja’ Tumau om Gas Sabah (SOGSC) om Koisaan Kuntiriktor Petroleum Bumiputera Sabah (PKPBS) mantad tonggungan diolo’ pinopoburu’ kogompitan rayat Sabah id siktor OGSE.
Pinokianu nogi’ disio oinsanan bohogian do monokodung inggisaman SOGSC om PKPBS montok papaanjur pitimungan OGSE diti do toun tiso’.
“Rikoton tokou nopo nga’ montok monuridong piromutan kosiwatan OGSE i kotolibamban do kuntirik timpu oniba’. Mongunsub tokou kopoundolihan toilaan, pialanan tiknologi om piuhupan di koposimbuat tongo’popogura’ nokoiyonon sumili bontugan songkoiyonon.
“Masaan tokou popo’iliu impohon okon nopo ko’ montok komogoton maso-maso nga nogi’ montok ekosistem OGSE i asangal, inovatif om ogirot montok sakag dumontol.
“Kohondot dilo’, kanou tokou miuhup papatantu’ Sabah okon nopo kotimporon sabaagi popogura’ oponsol ginoris, nga’ kosili nogi’ ombitanan kumaa kosunion ogirot om poinpuli id pomorunan tumau, gas om ginoris,” ka disio.
