Dr. Joachim (koduo, wanan) guminambar pongingitanan miampai tombului apantang i nokotindapou katalib gimik kinopoimpuunan ababayan dilo’.
PENAMPANG: Koporintaan Sabah potilombus tumopot id inggisaman posuni pihunungan om monginggirot piuhupan miampai tambalut sontimbang dau id Sarawak sabaagi wookon mantad inggisaman po’ompus montok mongunsub pisompuruan om komogoton songkoiyonon, ka di Kumoduo Boyoon Montiri II, Datuk Seri Dr. Joachim Gunsalam.
Minoboros ontok ababayan Pinialaan Golf Kaamatan Gawai 2025 i nakapanau id Buhavan Square, Donggongon di konihab, Dr. Joachim minoboros, koporintaan pogun mangakun do pialaan dilo’ sabaagi iso’ impohon oponsol montok monuridong piunungan om piombolutan id pialatan rayat Sabah om Sarawak – kosuul no id nayatan mogigiyon mamasok Kadazandusun om Dayak.
“Koporintaan Sabah tumilombus popoinsanang om mongunsub piromutan osuau nogi’ pihunungan miampai koombolutan tokou id Sarawak,” ka disio.
“Kohondot dilo’, pialaan golf diti kosili kosiwatan oponsol montok popokito angkab om kopurimanan koporintaan pogun.”
Miro (koduo, gibang) pinapatahak cek kinalantaion kuminaa di Carl om sinasi’ dii Dr. Joachim (koduo, wanan) om Ladislaus (wanan).
Pinosotol disio do kopongonjuran ababayan miagal diti okon nopo ko’ kapapanau tonggungan oponsol id kopomogompian piromutan koubasanan, nga nogi’ id koponompuruan mogigiyon id pototongkop Borneo.
“Pihunungan om piuhupan di ogirot diti koowit ponokotanda’ osonong montok koburuon om komogoton po’ompus goduduo kinoiyonon,” ka disio.
Dr. Joachim minoboros, Sabah om Sarawak miampai koinsanai dilo’ kopuli kikiro 60 pihatus ginayo tana’ Malaysia, nga’ nokopoiyon no do kikiro 20 pihatus mantad ginumu’ mogigiyon – iso’ haal i kopouyu kosiwatan agayo montok piuhupan kosudong di lobi kagayo.
“Pialaan diti okon nopo ko’ nokoponigampot kinosukodon, nga nogi’ nokopogirot piromutan om piombolutan id pialatan Lintuhun Pongindopuan om Pomorunan Kadazandusun (KCCI) o Lintuhun Pongindopuan om Pomorunan Dayak (DCCI),” ka disio kawagu.
Miampai minanangkabayahan kumaa nangkalantoi pinilaan toun diti, minongunsub po nogi’ isio sunduan di tongo’ tutumanud suai mooi do amu’ orologo.
“Id sunduan pisompuruan om piombolutan, aiso’ i naala’ do hiti – oinsanan nopo nga’ nakalantoi. I nakalantoi do otopot nopo kopio nga’ kagos di nokoinggirot pialatan mogigiyon tokou.”
Minongunsikou nogi’ isio kumaa tutumanud mantad Sarawak mantad sokodung ouli’ om kinotonudan diolo’ di poinponu’ sunduan, om pinopointalang do kinorikotan diolo’ nokoposindak po do pinialaan om nokoowit kinalantaion pinongonjuran dilo’.
Dr. Joachim minokianu nogi’ mooi do koubasanan sipoot Kaamatan-Gawai diti tilombuson, tu’ okito ilo’ do okon nopo ko’ iso’ pialaan, nga iso’ kapamaramaian pisompuruan om kopogisusuaian.
“Pialaan diti okon ko’ karait do golf nopo – ilo’ kokomoi do poposuni piromutan osonong, monginggirot kopogi’isaan om monuridong timpu dumontol di lobi kogirot goduo,” ka disio.
Nokotindapou nogi’ Presiden KCCI, Ladislaus Maluda; Presiden DCCI, Dato’ Allan Keripin; Monunurat Pulitik kumaa Montiri Koburuon Mongindapu’ om Koperasi Malaysia, Carl Moosom; Monunurat Agayo Parti Pesaka Bumiputera Bersatu (PBB), YB Miro Simuh; Monunurat Pulitik Premier Sarawak i po nogi’ Puru Kotinanan SME Corp id siriba’ Komontirian Koburuon Mongindapu’ om Koperasi, Bell Agan om Ponorikohon Manganganjur, Edmond Lo.
