Hajiji sinuau tongo’ susumayau koubasanan tangaanak ontok Ramai Kaamatan Suang Olung id Kampung Tutu, Selupoh, Tuaran di tadau baino’.
TUARAN: Boyoon Montiri, Datuk Seri Haji Hajiji Haji Noor minoboros, koporintaan pogun i haro do noondo diti nopo nga’ songinan koporintaan i toririmo opoduli’ kumaa kogugunoon rayat.
Minoboros isio, mogisusuai projik koburuon om ponguhupan nokoindalan montok kasasanangan rayat id Sabah.
Ka disio, id watas Sulaman, ogumu’ projik koburuon i nopongo kaampai no pinonuridongan Walai Mesra SMJ, minonginsonong talun-alun, jambatan nogi’ jeti, om lobi ogumu’ i masaan id pamalanan.
“Insya-Allah, nung koporintaan GRS kotilombus onuan mandat montok momorinta’ pogun diti, lobi kogumu’ projik miagal jambatan konkrit Labuaya do hiti maan poindalano’,” ka disio.
Hajiji minintong pinisahapan panantaban miokud.
Minoboros isio dilo’ id pamaramaian Ramai Kaamatan Suang Olung 2025, kinopoimpuunan Koisaan Koburuon Lotud Sabah nogi’ kinopoimaganan Lintuhun Orang Tua Kari Bin Guban id Kampung Tutu Selupoh, do hiti di tadau baino’.
Id boboroson disio, Hajiji nga’ minokianu nogi’ mogigiyon Suang Lotud do tumilombus misompuru.
“Mositi’ tokou tumilombus misompuru montok papatantu’ timpu dumontol mogigiyon lobi kanawau.
“Mimang oku mogigiyon Dusun Suang Lotud id Tuaran diti kosili iso’ mogigiyon di abantug om amu’ oiduanan,” ka disio.
Hajiji minintong pokikitanan momonsoi linangkit kopihondot Ramai Kaamatan Suang Olung.
Hajiji po nogi’ Puru Lintuhun Undangan Pogun (ADUN) Sulaman minoboros, montok iso’ tinaru di abaal, mogigiyon Dusun Suang Lotud nuru’ mananud pomusarahan di osonong.
“Maya’ ralan dilo’, poinponu’ kotumbayaan ku do mogigiyon Dusun Suang Lotud kotopong di tongo’ tinaru suai id Sabah,” ka disio i minoboros do mogigiyon dilo’ nuru’ nogi’ papatantu’ koubasanan om kinoubasanan kotilombus ogompi’ montok sinakagon obontol.
Ramai Kaamatan Suang Olung 2025, i pinaanjur do SALDA nakapaampai siam kampung ilo’ nopo nga’ Kampung Tutu, Penampang Baru, Limposu, Roun, Kiwatu, Labuaya, Selupoh, D’Angki om D’Mulus.
