Toh Puan Faridah (tanga’) guminambar miampai AJK UNK 2025.
KOTA KINABALU: 51 piboi mantad pototongkop pomogunon pikikiro mogiala’ monokisolod gaa’ Unduk Ngadau 2025 kopihondot Ramai Kaamatan do ko 30 om 31tw Mikat diti.
Pialaan nabantug i babaino’ diti nokosuang id edisi ko-65 dilo’ kotilombus kosili kosiwatan popokito kinolumison, kinomiloon nogi’ kinoulunan koonduan Sabah.
Ponorikohon Kounsol Koonduan Kotinanan Kadazandusun Murut Malaysia (KDCA), Tindarama Datuk Joanna Datuk Kitingan minoboros, posodia’an osorisid poindalan dumontol ababayan limunduk dilo’.
“Koinsanai puruankuasa Unduk Ngadau 2025 nokounda’ no do poinggogonop montok papatantu’ pongonjuran diti koindalan oturundus,” ka disio katalib kinotombuluyan apantang kuminaa sawo di Molohingon Agayo Pogun Sabah, Toh Puan Faridah Tussin, di tadau Kotolu.
Joanna ontok rinubaan media.
Kinotombuluyan dilo’ kituduan pinopointutun nuludan puru Komitikuasa’ Unduk Ngadau 2025 nogi’ pinapatahak kapagalapan pinotomod kuminaa di Toh Puan Faridah montok tumindapou ramai Sodop Piintutunan do ko 28tw Mikat om ababayan limunduk pialaan panantaban tohuri do ko 31tw Mikat.
Ka disio kawagu, mogisusuai ababayan koimbayat i noulud po’ompus Minggu’ Unduk Ngadau i kotimpuun do ko 26tw Mikat, kaampai ababayan koubasanan Sodop Pintutunan, ilo’ nopo nga’ kapatahakan ‘chest’ kumaa piboi i maan papanaho’ di Kumoduo Boyoon Montiri, Datuk Seri Panglima Dr. Jeffrey Kitingan.
“Do ko 27tw Mikat, piboi mooi tombului Muzium Sabah montok mongilo susuyan kahandaman om tungkusan koubasanan pogun diti, nogi’ tumanud kaparagatan koubasanan miagal monuntung tagung om koposodia’an takanon tinaru miagal hinava om tuhau.
“Doun sodopon nopo nga’ mintong yolo’ do tayangan pialaan ‘Culture, Agro-tourism and Nature’ (CAAN) i pohimogonon di Datuk Joniston Bangkuai,” ka disio kawagu.
Ababayan Sodop Unduk Ngadau nogi’ pialaan posokoton tinaru maan pohoroo’ do ko 28tw Mikat, pogulu ababayan limunduk koindalan do ko 31tw Mikat id Lintuhun Hongkod Koisaan KDCA.
Daamot dilo’, Ponorikohon Miampai Unguk Ngadau 2025, Dr. Mary Gambidau minoboros, pialaan diti nokointalang nosili kosiwatan momologkus bakat koonduan omulok Sabah id mogisuaian kaganaan miagal ponombuluyan, pongindopuan, kapanambarasan om seni pokikitanan.
“Pialaan diti nokopongukab ogumu’ kosiwatan kumaa koonduan tongomulok do lumaang lobi kosodu’ om popowongi’ ngaran Sabah id nayatan lobi kasawat,” ka disio pinopointalang.
Pinopoilo nogi’; isio do soginumu’ 70 mija di nobuking montok ababayan Sodop Unduk Ngadau, nga’ tulun ginumuan kakal kikosiwatan maganu tikid galeri i padagangon id gatang RM30.
