Hajiji miampai tongo’ lansanon pogun, puru tinimungan koumoligan om pakakaraja’ kolidasan.
KOTA KINABALU: Koporintaan pogun mangakun koponsolon tinimungan koumoligan om pakakaraja’ kolidasan, lolobi no kolubukan diolo’ id kopotontuan kotoronongon om kouludan ginumuan id Sabah solinaid diti.
Boyoon Montiri, Datuk Seri Haji Hajiji Haji Noor minoboros, pakakaraja’ nuludan kopogulu polubuk niawa diolo’ tikid tadau montok mongumolig rayat om pogun.
Hajiji pinapatahak balatak tindalam Tadau Rayat kumaa di Panglima ESSCOM Datuk Victor Sanjos.
Minoboros id ramai kinapatahakan tindalam Tadau Raya Aidilfitri kumaa nuludan kopogulu id Menara Kinabalu do hiti di tadau baino’, ka di Hajiji, pointonod toun nakatalib Sabah noumpadanandi pipiro kadaaton sandad.
Minoboros isio, kolimpuunon toun diti nopo nga’ Sabah nokotoguang liyud lolobi no id Kota Marudu, Kota Belud, Telupid, Pitas, Beluran, Lahad Datu, Sandakan, Beaufort, Tongod om Paitan.
Hajiji minamaramit toluod tindalam Tadau Raya mantad Kotinanan Muafakat Titipan Amal Sawo Mobi’ Rayat, Gabungan Rakyat Sabah (MUTIARA GRS) i pinotunud di Presiden dilo’, Datin Seri Juliah Salag, montok poikidon kumaa tinimungan koumoligan om pakakaraja’ kolidasan.
“Om nogi’, kointalangan kaawagu mantad Koupisan Meteorologi Malaysia mongiikiro do fenomena rasam poómpus kotimpuun mantad ko 18tw Kotolu gisom ko 21tw Kotolu id Sabah, Sarawak om koibutan Semenanjung.
“Suai ko’ liyud, haro nogi’ kadaaton kinotutudan toun diti id Likas i nokoowit 80 paganakan natagakan iyonon.
“Id timpu kadaaton diti, pakakaraja’ nuludan sogulu tokou, lolobi no tinan kiunifom, tinimungan koumoligan om kukumaraja’ kolidasan pinopoindalan tonggungan diolo’ amu’ monutun hinuyan montok manampasi niawa. Pounsikou amu’ gigina’ polombuson ku,” ka disio.
Hajiji minintong tindalam Tadau Raya i pinotoluod do mogisusuai komontirian, koupisan om GLC montok tinimungan koumoligan om pakakaraja’ kolidasan id Menara Kinabalu.
Hajiji minoboros, kapatahakan tindalam Tadau Raya dilo’ kirati kopio tu’ ponokotanda’ pongunsikohan koporintaan pogun kumaa kolubukan pakakaraja’ nuludan sogulu.
“Nosili ilo’ lobi kirati tu’ ramai diti pinapanau id wulan Ramadan. Komoyon nopo toluod diti iso’ ponokotanda’ mantad rayat Sabah montok mamagatang kolubukan puru koumoligan om pakakaraja’ kolidasan i poingkaraja’ id timpu karamaian om nosili pongunsuban montok tumilombus manahak surupukaraja’ miampai poinponu’ ginawo,”ka disio kawagu.
Hajiji do talib dilo’ minamaramit babarang raya i pinotoluod do 33 komontirian, koupisan om GLC pogulu pinapatahak dilo’kumaa 15 tinimungan koumoligan om pakakaraja’ kolidasan.
