Dr. Maria Suleiman
KOTA KINABALU: Koupisan Kolidasan Pogun (JKN) Sabah pinopoingkawas kapagantangan koburision om koumoligan takanon id bazar Ramadan maya’ Ops Bazar Ramadan 2025, i pinoindalan miampai kouhupan Bohogian Kikuasa’ Nokoiyonon (PBT).
Potunud Kolidasan Pogun Sabah, Dr. Maria Suleiman minoboros, soginumu’ 1,152 premis di pinorisa’ id 17 watas, kaampai Kota Marudu, Sandakan, Semporna om Keningau.
Ka disio, soginumu’ 2,393 poposodia’ takanon nga’ pinorisa’ nogi’, hinombo 97.2 pihatus nakaanu ponungkitan tifoid om 97.3 pihatus nokotindapou pintoriningan poposodia’ takanon.
Poingkuro po, bohogian kikuasa’ pinapalabus 34 notis kompaun kigatang RM5,200 mantad mogisusuai kasalaan, kaampai amu’ nakaanu setifikit pintoriningan poposodia’ takanon (32.4 pihatus), aiso’ ponungkitan tifoid (14.7 pihatus) om kinoponohuban kooturan koburision posokoton (47.1 pihatus).
Montok papatantu’ rontob koburision id bazar Ramadan kotilombus opiantangan, ka disio, 682 upisor pogirotkuasa’ sinuhu’ do popowonsoi pinomorisaan id 91 kinoiyonon bazar id pototongkop Sabah.
“Kopiantangan diti kopuli pomorisaan pogulu om mamaso Ramadan kumaa premis mangangaba’ kogogonopan ahata’, koposodiaan takanon, mangaba’ ais, nogi’ sinusulap padagangan id bazar,” ka disio id iso’ kointalangan kopihondot Ababayan ‘Walkabout’ Kopogintangan Bazar Ramadan 2025 do hiti di tadau baino’.
Ababayan dilo’ pinoindalan sabaagi wookon mantad inggisaman do papatantu’ takanon di padagangon katanud kooturan kolidasan. Ababayan diti kopiongoi di Akta Takanon 1983, Kooturan-Kooturan Takanon 1985 om Kooturan-Kooturan Koburision Takanon 2009.
Di ko 3tw Kotolu, Montiri Kolidasan, Datuk Dr. Dzulkefly Ahmad pinopoimagon Kimpin Koburision om Koumoligan Takanon Bazar Ramadan 2025 id ababayan Walkabout doid Bazar Ramadan Presint 3, Putrajaya.
Id kimpin diti, duo inggisaman oponsol pinointutunan, ilo’ nopo nga’ “Perhati dan Pilih” nogi’ “Budaya 3M”, montok mongingkawas kopurimanan tongo’ moomoguno id kopomilian takanon di oburisi’ om oumolig. “Perhati dan Pilih” (Mogintong om Momili’) mongunsub tongo’ moomoguno mogintong koburision premis om mongingindapu’ pogulu momoli takanon. “Budaya 3M” (Nubasanan 3M) nopo nga’ poposotol nubasanan koburision id koposodiaan takanon maya’ konsep ‘M-A-S-A-K’ (Mogonsok do poinsonong, Monompini’ kakamot, Popoopi’ do poinhunung, Waig om kogogonopan ahata’ oburisi’, Koburision tinan).
Montok papasangan ruputan kohondot koburision takanon, JKN Sabah pinopointutun ‘aplikasi’ WhatsApp Koporuputan Koburision Premis Takanon id numbur 012-848378, kapasaga’ tulun ginumuan poporuput nunu-nunu kobolingkahangan koumoligan takanon miampai mitilombus.
Kointalangan poinggonop aanu maya’ laman sesawang fsq.moh.gov.my.
