Koyuon kinotutudan id Kakadayan Kundasang di songkosodop.-Gambar Bomba
KUNDASANG: Soginumu’ walu’ premis, kaampai tolu kadai runcit, duo ‘inap desa’ (songkoduonon), iso’ blok walai siwa’ miampai 11 totobon, nogi’ iso’ situr poopian babarang runcit, nosorob id kinotutudan doid Kakadayan Kundasang di songkosodop.
Tumanud Longkod Kapapanahan Karaja’ (PGO) Koupisan Bomba om Monumpasi Malaysia (JBPM) Sabah, pamalahawan aarau-arau naramit di jaam ko 8.37 totuong om Balai Bomba om Monumpasi (BBP) Ranau suminikap pinopogura’ iso’ tiim kuminaa kinoiyonon kinaantakan, i poinsumpak kikiro 18 kilometer mantad Balai.
Tinimungan nokorikot id kinoiyonon kinaantakan di jaam ko 8.56 totuong om suminikap pinopoindalan kopomisokan.
Komander Operasi, PBK II KUP Juanie @ Girin Dullah om 15 puru nuhupan di mogisusuai kotinanan suai kaampai PDRM (7 puru), APM (7 puru) om SE (duo puru).
Karaja’ kopomisokan minomoguno duo paip kininaru 900 kaki miampai tolu totobpus nogi’ intodonon waig mantad injin om paip bomba.
Kinotutudan naanu minanamong poinponu’ di jam ko 10.09 totuong pogulu pinupusan karaja’ di jaam ko 12.52 pitanga’ tuong. Aiso’ nohompitan pinoruput id kinaantakan diti.
Kinotutudan nokohompit tolu kadai runcit ponit amu’ potimporon kiginayo 10×20 kaki pasagi’, duo walai songkoduonon ponit amu’ potimporon kiginayo 26×36 kaki pasagi’, iso’ blok walai siwa’ 11 tobon ponit amu’ potimporon kiginayo 100×350 kaki pasagi’, nogi’ iso’ siktor poopian babarang runcit ponit amu’ potimporon kiginayo 30×50 kaki pasagi’, i koinsanai dilo’ nou’u.
Karaja’ diti binuruan di PPgB Ridwan Mohd. Taib, i po nogi’ Luguan BBP Ranau.
