Ramlan (gibang) pinopoilo kuminaa di Tun Musa di posodiaan SPR.
KOTA KINABALU: Suruhanjaya Pomilian Agayo (SPR) Malaysia sumosodia’ montok monoguang Pomilian Agayo Pogun Sabah ko-17.
Ponorikohon SPR Malaysia, Datuk Seri Rahman Harun minoboros oinsanan posodiaan nowonsoi poinsonong montok papatantu’ koturunduson koindalanon pomilian agayo dilo’ do orikot.
Tun Musa (tanga’) guminambar miampai tinonudan mantad SPR.
“Posodiaan SPR kumaa kopoindalanan Pomilian Agayo Pogun Sabah i opupusan timpu dau do wulan Kohopod om Iso’diti, SPR nokosododia’ no.
“Nogi’, koinsanai pakakaraja’ id nayatan siriba’ nokounda’ montok popoindalan pomilian agayo do soiraira’ nopo timpu.
“Tun Musa nga’ minamason mooi do SPR kapatantu’ kapapanaho’ pomilian agayo aanu popoindalan miampai oturundus montok papatantu’ kotoronongon om kaadangon pulitik id Sabah,” ka disio kuminaa media katalib pinapaharo kotombuluyan apantang kumaa di Molohingon Agayo Pogun Sabah, Tun Musa Aman id Istana Seri Kinabalu, di tadau baino’.
Id kinotombuluyan dilo’ i Ramlan pinopolombus nogi’ panangkabayahan kumaa di Tun Musa mantad kinoposilihan sabaagi Molohingon Agayo Pogun Sabah di wagu.
Wookon i nokotindapou id kinotombuluyan dilo’ i Monunurat SPR Datuk Ikmalrudin Ishak om Potunud Upis Pomilian Agayo Sabah, Rohiman Rahia.
