Hajiji pinopoindalan ‘gimik’ kinopoimpuunan Ababayan Sentuhan Kasih Rakyat Sabah (SYUKUR) 2025 id Longkod Koubasanan Rumpun Bajausama id Tuaran, di tadau baino’.
TUARAN: Koporintaan Pogun popoindalan iso’ po ababayan wagu montok monguhup monginggaan koinggoritan mogigiyon do toun diti, ka di Boyoon Montiri, Datuk Seri Haji Hajiji Haji Noor.
Minoboros isio, inggisaman wagu diti nopo pomoruhang kumaa pipiro ababayan i nokoindalan no kaampai Ababayan Sentuhan Kasih Rakyat (SYUKUR) i pinoimpuun di tadau baino’.
“Sabaagi koporintaan i toririmo opusou om opoduli’ mogigiyon, lolobi miampai kinoingkawason kos koposion noondo diti, nuru’ tokou momusorou i koponguhup mogigiyon pogun diti.
“Ababayan diti pikikiro pahabaron do toun diti nung koinsanai palan koindalan oturundus om oulud suai ko’ tumanud kosukupan kousinan pogun.
“Yoho’ om tambalut ku id Kabinet Pogun toririmo momusorou inggisaman om laang i kaanu monguhup mogigion lolobi no yolo’ i mosikin om mosikin ‘tegar’. Soira’ oinsanan pibarasan nopongo, poilaan tokou kumaa mogigiyon,” ka disio id kinopoimpuunan SYUKUR 2025 id Longkod Koubasanan Rumpun Bajausama Sabah, do hiti di tadau baino’.
Hajiji miampai wookon mamaramit Ababayan Sentuhan Kasih Rakyat Sabah (SYUKUR) 2025 id Longkod Koubasanan Rumpun Bajausama id Tuaran, di tadau baino’.
Ababayan SYUKUR kituduan monginggaan koinggoritan kousinan mogigiyon om papatantu’kasasanangan koposion diolo’ pointamong.
Ababayan diti koposodia’ ponguhupan tusin tunui soginumu’ RM300 tikid wulan kumaa mamarmait di kosudong gisom ko 31tw Kohopod om Duo 2025 miampai ginumu’ kinopoobian RM358.5 riong om kapanahak koundaran kumaa 100,0000 tulun mamaramit.
“Pointonod do wulan Koduo 2025, soginumu’72,058 Luguan Suang Walai (KIR) mosikin om mosikin tegar i poinrojistor id sistem e-Kasih gisom di ko 31tw Kohopod om Duo 2024 nakaramit koundaran diti.
“Mantad ginumu’ dilo’, soginumu’ 52,201 mamaramit nakaramit no do bayaran mitilombus kumaa akaun bank minimpuun di ko 17tw Koduo katatalib, naamot 19,857 po mamaramit i aiso’ akaun bayaran miampai mogisuhut-suhut i potuu maya’ ponguhupan miampai tunui toi kopongukaban akaun pinotomod montok papasanang kapambayaran fasa kumoiso’ do popowonsoi gisom wulan Kotolu diti,” ka disio.
Ka disio, koporintaan pogun nga’ popoindalan nogi’ do Fasa Koduo ababayan diti do wulan Kolimo 2025, i kopoinggayo po do koundaran kumaa lobi kogumu’ mamaramit, kaampai yolo’ i id nuludan e-Kasih nogi’ tinimungan mosikin om mosikin tegar i natatak mantad nuludan pogulu diti.
Kohondot dilo’, kalansanan di Hajiji mantad kopoindalanan ababayan diti, koposion diolo’ aanu mongingkawas nogi’ mongimbulai mogigiyon i lobi asanang om pointonggoi.
“Mimang oku inggisaman poompus poindalanon id niyonon montok papatantu’ diolo’ i natatak om kosudong kaanu ponguhupan diti nga’ amu’ poinrojistor id Pangkalan Data Pogun Sabah toi PADANS kaanu popotoguang ruputan kumaa Molohingon Kampung toi Upisor MySMJ Profiler i pinoiyon id koinsanai upis watas doid pogun diti.
“Kalansanan ku mooi do SYUKUR kosili iso’ inggisaman i nosili iso’ karaja’ poómpus i koowit waya’ osonong kumaa mogigiyon kopiongoi di angkabon Sabah Maju Jaya (SMJ) id kopoingkawasan kasasanangan mogigion,” ka disio.
Songulun mamaramit pinopokiro telipaun piowit-owit dau kuminaa di Hajiji do tusin ponguhupan SYUKUR nokosuang no id akaun dau.
Daamot dilo’, ginumu’ pambayaran SYUKUR powonsoiyon tumanud fasa miampai tikid fasa nopo nga’ bayaran maya’ ‘lump-sum’ montok timpu tolu wulan ilo’ nopo nga’ soginumu’ RM900 i posuangon kumaa akaun diolo’ i kiharo akaun om kumaa mamaramit ponguhupan miampai tunui.
Fasa iso’ do wulan Koiso’-Kotolu 2025, poikidon mimpuun wulan Koduo naamot fasa koduo (Kaapat-Koonom 2025), poikidon mimpuun wulan Kaapat; fasa kotolu (Koturu’-Kosiam 2025) poikidon mimpuun wulan Kosiam 2025 om fasa kaapat (Kohopod-Kohopod om Duo 2025) poikidon do wulan Kohopod 2025.
Montok kopogintongan di mamaramit om pambayaran aanu powonsoiyon maya’ laman web Sistem PADANS https://padans.sabah.gov.my/; Laman web http://sukur.sabah.gov.my/;
YONO Superapp; om nogi’ Koponsunudan pambayaran (SMS).
Kopongintongan mamaramit SYUKUR aanu momoromut mimpuun tadau baino’ (19tw Koduo 2025).
