Hajiji tinanud di Montiri Ponombuluyan, Koubasanan om Sandad Posorili’, Datuk Seri Panglima Christina Liew pinopowonsoi ‘gimik’ kopoimpuunan Ababayan Mamabak Tana’ Kompleks Koubasanan Sabah.
KINARUT: Koporintaan pogun tumilombus popoinparagat inggisaman monginsonong kopomogompian tungkusan koubasanan om koponguludan sandad posorili’ montok tumilombus poposiau om papagaras pomorunan ponombuluyan id pogun diti.
Boyoon Montiri, Datuk Seri Haji Hajiji Haji Noor minoboros, montok monokodung inggisaman dilo’, koporintaan pogun pinopoobi’ RM102.87 riong kumaa Komontirian Ponombuluyan, Koubasanan om Sandad Posorili’ pogun montok karaja’ om kopoindalanan mogisusuai kaparagatan nogi’ projik koburuon do toun diti.
Hajiji tinanud di Montiri Ponombuluyan, Koubasanan om Sandad Posorili’, Datuk Seri Panglima Christina Liew pinopowonsoi ‘gimik’ kopoimpuunan Ababayan Mamabak Tana’ Kompleks Koubasanan Sabah.
Minoboros isio, pomorunan ponombuluyan pogun diti momoguno lobi kogumu’ produk wagu i aanu silihon pongimbayat tutumombului mantad suang om labus pogun tu’ sabah kiharo mogisusuai intodonon ponombuluyan i aanu inggumuan i potuu mimpau do ‘flora’ om ‘fauna’ (sumusuni om mamaamasi) toi ko’ tataba’ koubasanan nogi’ tungkusan tinaru pogun diti.
Kopiongoi do angkabon dilo’, nangatan disio tongo’ gompuburu’ pomorunan ponombuluyan id pogun diti monukai pomusarahan wagu montok papaharo produk ponombuluyan koimbayat, potilombus dino kapatantu’ Sabah kotilombus kosili sumpilion tutumombului saalom om labus pogun.
“Inggisaman tokou montok mongimbayat korikotan tutumombului kumaa Sabah miampai mongingkawas asil ponombuluyan nogi’ nga’ kopisuhut di tonggungan koporintaan Malaysia montok papalantoi kimpin Toun Monombului Malaysia (TMM) 2026 i momorikot lobi 35 riong tutumombului.
“Sundung Sabah momorikot soginumu’ 3.7 riong tutumombului, nga’ montok posodiaan do TMM2026, mositi’ tokou no do sumodia’ mamaramit korikotan lobi kogumu’ tutumombului kumaa pogun diti. Kohondot dilo’, gompuburu’ pomorunan kiguno poinsodia’ lobi komilo montok momoruhang produk wagu ponombuluyan pogun diti,” ka disio id Ramai Mamabak Tana’ Kompleks Koubasanan Sabah id Kinarut, Papar, di tadau baino’.
Ka di Hajiji, gompuburu’ pomorunan ponombuluyan, kaampai id nayatan mongindapu’ tomulok nuru’ tumilombus momoguno tiknologi wagu id kopointutunan asil ponombuluyan mimpau koubasanan nokoiyonon tu’ ralan dilo’ kopointutun kinolumison koubasanan Malaysia, potilombus dino koimbayat kororohian tutumombului rumikot kumaa pomogunon diti.
Suai dilo’ ka disio, kopoburuan asil ponombuluyan di wagu diti koposodia’ nogi’ kosiwatan pakarajaan nogi’ manahak kosiwatan kumaa mogigiyon nokoiyonon do gumompit om kopuriman koundaran mantad pomorunan ponombuluyan.
Otumbayaan isio Kompleks Koubasanan Sabah i kopohompit ponuridongan duo komponen agayo, ilo’ nopo nga’ Kampung Budaya om Longkod Koubasanan kosili produk ponombuluyan wagu i kopouyu nawawaya’an di olumis, ‘inovatif’ om sopisuai mantad ponombuluyan di poinharo mantad.
Ka disio, kompleks diti nga’ kosili pomoruhang kumaa longkod koubasanan poinharo mantad id pogun diti ilo’ nopo nga’ Longkod Koubasanan Hongkod Koisaan, Koisaan Koubasanan KadazanDusun, Longkod Koubasanan Rumpun Bajau Sama Sabah om Longkod Koubasanan Murut Tenom.
Ka disio, koponuridongan Kompleks Koubasanan Sabah maya’ piuhupan ‘pintar’ pialatan koporintaan pogun om siktor swasta, nopo nga’ kointalangan tonggungan po’ompus mantad koporintaan montok papaharo kompleks kumoiso’ i kopotimung tungkusan koubasanan mogisuai tinaru id pogun diti.
“Iti insan-insan kopokito kotimpuunon kumaa iso’ po ponokotanda’ oponsol montok Sabah i kopokito angkab tokou montok momogompi’, mamagatang om papabantug tungkusan koubasanan pogun i opuawang miamapi kinolumison tinaru om kinoubasanan dau.
“Koporintaan pogun papatantu’ kopoburuan projik diti aanu poindalanon do poinhunung, tumanud buris puralan om kooturan di nakatantu’. Koundaran mantad kalantaion projik diti okon nopo ko’ opurimanan do sinakagon noondo, nga nogi’ timpu dumontol,” ka disio.
Hajiji nga’ minongunsub nogi’ oinsanan lansanon mogigiyon, momuruan koupisan om kotinanan koporintaan Pisompuruan om pogun, tinan okon koporintaan (NGO) di poinhompit om oinsanan mogigiyon pogun diti do tumilombus papagaras om momogompi’ seni, koubasanan om tungkusan tinaru i pasanganu dati’ miampai poinsonong mooi do amu’ atalup mantad waya’ timpu.
“Kanou tokou no toinsanan monokodung inggisaman diti montok monigampot imanon poposili Sabah sabaagi pogun i opuawang do tungkusan om koubasanan,” ka disio.
