Dr. Jeffrey Kitingan
KOTA KINABALU: Iso’ kes tomporuruol Pompogon Wogok Afrika (African Swine Fever – ASF) noilaan kawagu id watas Keningau di ko 7tw Koiso’ 2025, nokopohompit songulun momogompi’ wogok kampung.
Kumoduo Boyoon Montiri I, Datuk Seri Dr. Jeffrey Kitingan pinopoimagon do mantad di 20 tinan wogok i pasanganu di momogompi’ dilo’, 12 tinan norolihan tomporuruol dilo’.
Isio po nogi’ Montiri Pomutanaman, Ponginsadaan om Pomorunan Takanon minoboros, kopomunsahan wogok om kapanamangan kogugurao’ pinoindalan do Koupisan Surupukaraja’ Veterinar (DVS) Watas Keningau, nokoposili Keningau nokoguli’ kuminaa zon aragang (Zon Norolihan) soira’ di pogulu diti id zon otomou (Zon Ponondulian).
“Tumanud ponoriukan, wogok ginompi’ nokopokito tanda-tanda’ klinikal miagal amu’ songkuro makan, oluhoi, momuwaig todung, om kinapataion. Sampel di nanu noilaan do positif ASF do makmal.
“Kopiongoi di Subseksyen 45(2) Enakmen Tayam 2015, DVS minaganu laang otimpas, kaampai kapagantaban koguraon wogok om produk wogok mantad watas Keningau, kinopoingkawasan ‘servalens’ ‘aktif’ om ‘pasif’ id pototongkop Sabah, nogi’ ponontudukan ‘biosekuriti’ kumaa moomogompi’ montok papatantu’ koiyonon om kandang id koyuon di pointamong.
“Moomogompi’ nga’ oduhan manahak topod taakanon ropuhan mata’ kumaa wogok om kumakap koiyonon toi kandang di kitomporuruol. Suai dilo’, moomogompi’ pinosorou do amu’ momoli wogok miau toi produk wogok mantad intodonon di amu’ noilaan koyuon kolidasan dilo’,” ka disio id kopointalangan di tadau baino’.
ASF mantad no do Asfvirus, i nokopogkoroliu wogok maya’ kotopisan mitilombus di wogok kitoruruol toi miampai amu’ mitilombus maya’ kakamot toi sosongulun di noyomutan.
Poingkuro po, tomporuruol diti okon i ko’ ‘zoonotik’ om amu’ kopogkoroliu tulun. Tongo’ moomogompi’ unsubon sumikap poporuput kaantakan wogok sumakit toi apatai kumaa upis DVS dodoros montok manalob kopogkorolihan tomporuruol dilo’ miampai osikap.
Pangaba’ tonsi’ wogok dumontol Toun Wagu Sina korungod
Dr. Jeffrey minoboros, DVS nga’ pinopoilo nogi’ do pangaba’ tonsi’ wogok dumontol Toun Wagu Sina korungod, miampai intodonon aanu mantad kandang wogok nokoiyonon id Kota Kinabalu, Sandakan om Tawau.
“Gisom noondo diti, aiso’ kes ASF noilaan id bakas, om kandang wogok komersial id Tawau, Sandakan, Tenom, Papar, Tuaran nogi’ Penampang i kakal poingidu’ mantad tomporuruol.”
Mogigiyon pinokianu amu’ aranaban tu’ ASF amu’ kopongumpadan kolidasan tulun. Laang mingat-ingat om kotonudan ponuhuan di moomogompi’ kouhup manamong kopogkorolihan tomporuruol diti.
Nokopogulu, Dr. Jeffrey i po nogi’ Presiden Parti Solidariti Tanah Airku (STARSABAH) pinapaharo ‘walkabout’ kopihondot Toun Wagu Sina’ id pososorili’ Kota Kinabalu.
