Tun Juhar om Hajiji guminambar miampai tongo’ mamaramit gaa’.
KOTA KINABALU: Koporintaan Pogun pinapatahak geran ponolidikan kigatang RM6.5 riong kumaa Univositi Malaysia Sabah (UMS) om Kursi Bajau Samah dau.
Boyoon Montiri, Datuk Seri Haji Hajiji Haji Noor i po nogi’ Pro-Canselor UMS, pinapatahak geran dilo’ kuminaa di Kumoduo Timbang Canselor (Ponolidikan om Inovasi) UMS, Prof. Ir. Dr. Rosalam Haji Sarbatly id ramai kapatahakan Gaa’ Ponolidikan UMS (APUMS) 2024 id longkod Konvensyen Sompomogunan Sabah (SICC) do hiti, di songkosodop.
Soginumu’ RM2.5 riong mantad geran Koporintaan Pogun pinoobi’ montok Ponolidikan Makmal Poinpasi, naamot RM4 riong po montok Kursi Bajau Samah.
Hajiji pinapatahak cek ‘replika’ kigatang RM4 riong montok Kursi Bajau Samah UMS kuminaa di Dr. Rosalam, sinasi’ di Tun Juhar.
Id ramai di miagal i notindapou nogi’ di Molohingon Tagayo Pogun Sabah, Tun Juhar Mahiruddin, i po nogi’ Canselor UMS, univositi dilo’ nga’ minamaramit geran ponolidikan kigatang RM8.61 riong mantad PETRONAS.
Timbang Presiden Totuo PETRONAS, Datuk Ir. Bacho Pilong pinapatahak ‘replika’ cek kuminaa di Dr. Rosalam.
Hajiji talib dilo’ minananud di Tun Juhar montok pinapatahak Gaa’ Pinotomod Tun Canselor, i nosili ababayan kopio do sodop dilo’, kumaa di Prof Justin Sentian, sainstis Malaysia kumoiso’ i pinopoindalan ponolidikan timpu osogit id Antartika.
Iso’ ababayan ponokotanda’ minomutul kek nga’ pinapanau montok minamarami kinouliton toun ko-30 UMS.
