Hajiji guminambar miampai wookon mamaramit kopihondot Ramai Kapatahakan Ponguhupan Balajaran Pogun Sabah id Lintuhun Bankuasi, Menara Kinabalu di tadau baino’.
KOTA KINABALU: Mimpuun toun tiso’, Koporintaan Pogun popoobi’ kikiro RM50 riong montok monguhup mogigiyon kampung i kotoguang kobolingkahangan mambayar bil lotirik diolo’.
Boyoon Montiri (KM), Datuk Seri Haji Hajiji Haji Noor pinapawara’ dilo’ ontok minoboros id Ramai Kapatahakan Ponguhupan Balajaran Pogun Sabah doid Lintuhun Bankuasi Utama, Menara Kinabalu, do hiti di baino’.
“Inggisaman diti nanu montok monguhup monginggaan tonggungan mogigiyon kampung i kosudong om kotoguang koinggoritan id kapambayaran bil lotirik diolo’.
“Suai dilo’, mimpuun toun tiso’, koporintaan pogun nga’ monguhup soginumu’ RM300 kumaa molohing adalaan mosikin id pogun diti, solinaid sontoun,” ka disio.
Nokopogulu, minoboros isio koporintaan pgoun tumilombus poposodia’ mogisusuai ponguhupan balajaran montok papatantu’ mogigiyon pogun diti okon nopo ko’ kopongoput balajaran miampai lobi kogonop nga kaanu rumompok gisom nayatan lobi kasawat.
Iti sabab no ka disio, balajaran nopo nga’ poimpahan di oponsol kopio kumaa sukod wagu sabaagi posunduran agayo poposili diolo’ tumungkus pogun di osonong, kitoilaan om kipogoyuon osonong.
“Mantad no dilo’, koporintaan pogun monilombu kapanahakan ponguhupan kumaa kotinanan balajaran, susumikul kaampai no pinopointutun pipiro ponguhupan wagu montok monompuan tangaanak Sabah i mongoput balajaran kumaa nayatan lobi kasawat.
“Wookon dilo’, Biasiswa Koporintaan Pogun Sabah miampai kinopoobian kiginumu’ RM127 riong, i momorikot koponguhupan soginumu’ 3,850 susumikul wagu i balajar id univositi nokoiyonon om labus pogun om monguhup susumikul nuhupan di poinharo mantad, do toun tiso’.
“Ginumu’ diti nokoingkawas nung piadangon RM113 riong i pinoobi’ koporintaan do toun diti. Suai dilo’, montok toun 2025, Ababayan Biasiswa, Dermasiswa om Pangalasan Pinsingilaan Yayasan Sabah pinopoobi’ soginumu’ RM57 riong montok 4,500 tulun susumikul,” ka disio.
Hajiji minoboros, koporintaan pogun maya’ koupisan om kotinanan dau minaganu inggisaman miampai pinoposodia’ mogisusuai ponguhupan balajaran om toluod miagal ponguhupan biasiswa, dermasiswa, pangalasan pinsingilaan om ponguhupan zakat montok popoinggaan winagat i tonggungon do molohing.
“Diti tadau baino’, kopouyuhan ponguhupan Biasiswa Koporintaan Pogun Sabah nga’ pinatahak kuminaa soginumu’ 100 susumikul montok tumanud pinsingilaan id kotinanan pinsingilaan takawas (IPT) doid Univositi Malaysia Sabah Kampus Kota Kinabalu.
“Koporintaan pinapatahak nogi’ ponguhupan maya’ Tabung Balajaran Pogun Sabah (TPNS), miampai soginumu’ 100 suusmikul nakaampai minamaramit ponguhupan diti. Gisom noondo, pinoilo oku, TPNS nakapatahak sogintob RM8.5 riong om nakapanahak koundaran kumaa soginumu’ 8,000 susumikul.
“Pinatahak tokou nogi’ do ponguhupan BISBAH toi ‘Bantuan Ihsan Sekolah Sabah’ montok toun 2024 miampai kinopoobian soginumu’ RM10 riong i nokopohompit oinsanan sikul id Sabah. Suai dilo’, pinatahak nogi’ wookon Ponguhupan Ihsan Komputer (BAIK) om Ponguhupan Pinotomod Ababayan Balajaran (BANTU),” ka disio.
Daamot dilo ka disio, koporintaan pogun pinopoobi’ soginumu’ RM79.5 riong montok ponguhupan ngaawi’ balajaran miamapi ‘one off’ kaampai ponguhupan ugama’ om boros sastera, montok toun 2025.
“Iti kopohompit ponguhupan balajaran di wagu om poinharo mantad i tinilombus po montok toun tiso’, wookon dilo’ BUDI (Bantuan Tunai Pendaftaran IPT Miampai One Off); BAKTI (Bantuan Khas Tunai Peperiksaan); BISATRI (Bantuan Ihsan Tabungan Pendidikan Negeri) om AKSA (Anugerah Kecemerlangan Pendidikan Sabah).
“Suai dilo’, BAGUS (Bantuan Aktiviti PIBG); BALKIS (Bantuan Penyelenggaraan Kecil
Sekolah) om SEMESTA (Sekretariat Mahasiswa Sabah Malaysia). Iso’ kawagu inggisaman wagu pointutunai ilo’ nopo nga’ Ponguhupan Kaparagatan Sikul (SUKSES) miampai rontob RM3,000 kumaa 1,500 tinan sikul,” ka disio.
Daamot dilo’ minoboros isio, Kounsol Ugama’ Islam Sabah maya’ kousinan zaakt pinopogura’ po nogi’ mogisusuai inggisaman balajaran kumaa kapagarasan om mongingkawas naangayan balajaran kosuul no id pogun diti.
“MUIS pinapabalanja soginumu’ RM32.5 riong di toun 2023 montok monguhup tinimungan asnaf id nayatan tangaanak sikul, mongiingia’ om susumikul ngaawi’ id kotinanan pinsingilaan akawas koporintaan om swasta maya’ Inggisaman Balajaran MUIS.
“Gisom wulan Kohopod om Iso’ toun diti, haro kinoinsawaton kiginumu’ RM4.9 riong mantad di toun pogulu dilo’ miampai pabalanjaan koinsanai kiginumu’ RM37.4 riong.
“Mantad dilo’, maya’ kinopoobian Bajet MUIS 2025 soginumu’ RM47.3 riong pinotomod montok kaganaan balajaran, poobion do toun tiso’,” ka disio.
