Hajiji (tanga’) suminasi’ piniolonan dokumen pibatosan subpajakan id pialatan di Victor (gibang) om Chen (wanan).
KOTA KINABALU: Boyoon Montiri, Datuk Seri Haji Hajiji Haji Noor di tadau baino’ suminasi’ piniolonan dokumen id pialatan SBH Kibing Solar New Energy (M) Sdn. Bhd. om duo komponi poinhompit koporintaan (GLC) Sabah montok kilang kapamansaian ‘kaca solar’ kigatang RM7.2 bilion di wagu id Kimanis.
Boyoon Montiri minoboros, kopoopuan wagu diti oponsol montok monguhup kosunion ikonomi Sabah om monsupu’ kosiwatan pakarajaan montok mogigiyon nokoiyonon.
Pinialanan kumoiso’ nopo pibatosan ‘subpajakan’ id pialatan SBH Kibing om Fakosrama Sdn. Bhd., songinan tanak komponi pasanganu poinponu’ Tinimungan Sawit Kinabalu.
Pibatosan subpajakan diti kopongukab waya’an kumaa koponuridongan kilang kapamansaian kaca solar kitiknologi akawas, i pikikiro kosili iso’ mantad kogogonopan bobos agayo i kaagal dilo’ id ponongkoiyonon diti.
Hajiji (tanga’) suminasi’ pinialanan dokumen Pibatosan Induk pialatan dii Adzmir (gibang) om i Li.
Kopoburuan diti nopo wookon mantad palan SBH Kibing i kituduan montok monginggayo kogogonopan ginoris aanu monginwagu Sabah, monginggirot nindikohon dau id pidagangan ginoris solar pomogunan om momogonop kilang di haro mantad do komponi poinlongkod id China dilo’ i noukaban id Taman Pomorunan Kota Kinabalu (KKIP).
Kogogonopan kaca solar wagu diti poposotol nogi’ tonggungan Kibing kumaa kosunion ginoris aanu monginwagu id Sabah om monuridong koiyonon pamansaian agayo id Sabah.
Minongobi’ Fokasrama nopo, i Potunud Mongungulud/ Luguan Upisor Eksekutif Tinimungan Sawit Kinabalu, Datuk Victor Ationg, naamot Ponorikohon, William Chen minongobi’ SBH Kibing Solar New Energy (M) Sdn. Bhd.
Piniolonan dokumen koduo nopo montok Pibatosan Induk id pialatan SBH Kibing Solar New Energy (M) Sdn. Bhd om Sabah Energy Corporation Sdn. Bhd. (SEC) montok mangaba’ 45 riong kaki’ padu sitandod gas sandad sangadau (mmscfd) montok monokodung kapapanahan kilang wagu dilo’.
Sabaagi mangangaba’ agayo gas sandad id Sabah, SEC tumilombus papapanau tonggungan oponsol id koposiahan kosunion ikonomi songkoiyonon maya’ panalsaian ginoris i aanu kotumbayaan om oburisi’.
Minongobi’ SEC nopo Luguan Upisor Eksekutif dilo’, Datuk Adzmir Abd Rahman naamot Kumoduo Potunud Kopoindalanan SBH Kibing Solar New Energy, Celine Li suminain id koobian komponi.
Nokotindapou nogi’ Montiri Koburuon Pomorunan om Mongindapu’, Datuk Phoong Jin Zhe, Ponorikohon SEC, Datuk Annuar Ayub, Monunurat Pogun, Datuk Seri Sr Safar Untong nogi’ Upisor Otuo i minongobi’ boogian di suminain pinibatosan.
Boyoon Montiri do talib dilo’ minonorikohon mitingan Kotinanan Potunud Sawit Kinabalu om Borneo Samudera.
