Hajiji (kaapat, wanan) ruminamit kinopogulian bondira’ Sabah i pinokili id Antartika di Dr. Justin (kotolu, gibang) ponokotanda’ kinalantaion minomogonop Ekspedisi Ponorilidikan Timpu Osogit id Antartika om poingintong i Dr. Mohammad Saffree (kolimo, gibang) om i Abd. Shukor (kaapat, gibang) id upis disio doid Menara Kinabalu, Kota Kinabalu, di ko 23tw Koiso’ toun diti.
KOTA KINABALU: Naangayan poinlobi-lobi om abantug saintis Univositi Malaysia Sabah (UMS), Profesor Dr. Justin Sentian minonimpuun pamanahan kuminaa pomogunon Antartika ontok timpu modsogit nopo nga’ koondosan kumaa mogigiyon Malaysia.
Boyoon Montiri, Datuk Seri Haji Hajiji Haji Noor minoboros, naangayan di Dr. Justin okon nopo ko’ nokotolibamban kinalantaion disio sondiri’, nga nogi’ iso’ tanda’ kinalantaion om koondosan montok pomogunon tokou Malaysia, Sabah om nogi’ UMS.
Ka disio, naangayan di Dr. Justin nakapasaga’ disio onuan duo kopongokunan miandad id Malaysian Book of Records (MBR), sabaagi mogigiyon Malaysia kumoiso’ i pinopoindalan ponolidikan timpu osogit miampai koyuon sinogit di nakadala’ om nogi’ tulun Malaysia kumoiso’ i nokoiyon-iyon bobos alaid id koiyonon Antartika ilo’ nopo nga’ solinaid turu’ wulan.
“Kopiongoi di naangayan diti, kopongokunan nga’ pinatahak nogi’ kumaa Yayasan Ponolidikan Antartika Sultan Mizan (YPASM) sabaagi manganganjur ekspedisi ponolidikan timpu osogit kumoinsan id koiyonon Antartika,” ka disio id Ramai Kinapamaga’an The Malaysia Book of Record Ababayan Ponolidikan Timpu Osogit id Antartika kuminaa di Dr. Justin Sentian om YPASM id Lintuhun Bangkuasi UMS do hiti di tadau baino’.
Teks boboroson disio binasa’ di Montiri Komulakan om Sipoot, Datuk Ellron Alfred Angin.
Ka di Hajiji, kopongokunan akawas i pinatahak diti kopokito do mogigiyon Malaysia kaanu popowonsoi toisoiso’ id labus mantad kinoubasanon om kopokito tonggungan om kinalantaion pomogunon tokou kumaa kobontugan id ‘inovasi’ om ponolidikan saintifik.
“Kinogooson disio montok suminangal om miniyon do alalaid id koiyonon Antartika id koyuon tawan di adalaan ontok timpu modsogit, kopokito tinoboi om tonggungan di akawas kopio, okon nopo ko’ id ponolidikan disio kopohompit do kosimbanon ‘iklim’ om ‘dinamik kimia atmosfera’ id Antartika, nga nogi’ mantad sunduk kinasangalon tinan om tutok di poinlobi-lobi kopio.
“Otumbayaan oku, pinamanahan disio kuminaa Antartika kopokito sunduan, angkab om kopurimanan mokimoilo di poinralom om sunduan diti kaanu sumili intodonon pomusarahan om turianan, okon nopo ko’ kumaa tinimungan mononolidik, nga nogi’ kumaa koinsanai mogigiyon lolobi no kopio sukod wagu,” ka disio.
Minoboros isio, geran ponolidikan i pinagaa’ kuminaa di Dr. Justin Sentian nokouhup kumaa kinoburuon toilailaan om kopomorotian kohompit Antartika, lolobi no id kaganaan kosimbanon iklim, i noondo diti nosili kobolingkahangan global di alasu’ pogibooborosan.
Ka disio, naangayan ababayan akademik i pouyuhon id UMS nopo kointalangan do tonggungan univositi dilo’ id kopongimbulayan mononolidik om tulun di abantug i nakapanahak waya’ osonong kumaa pomogunon om koinsanai mogigiyon.
