Kokitanan do kosolimbahan nokotonu’ om video.
KOTA KINABALU: Luguan Kopointalangan Gabungan Rakyat Sabah (GRS), Datuk Joniston Bangkuai minogolim totondos do Parti Bersatu Sabah (PBS) om Parti Solidariti Tanah Airku (STAR) mamalan monotk tumanding miampai poinpoopori id pomilian agayon pogun do obontol.
Minoboros isio, goduduo PBS om STAR kakal otiu’ kumaa piomungan nokoiyonon GRS, misokodung sabaagi nuludan miiso’ id pisangadan pomilian agayo obontol.
“Ilo’ nopo nga’ pongumbalan do bohogian atantu’ i aiso’ tinonggungan i kiangkab montok mongurias GRS sabab sokodung di mingkawas kumaa parti nokoiyonon montok tumilombus momuruan Koporintaan Pogun,” ka disio.
Totondos dilo’ nokoimbulai nosusuhut kinotonuan om video i nokopokito kinotu’ habar i minonondos, do wookon, do PBS om STAR kipalan montok mongoi miampai ‘solo’.
“Bohogian aiso’ tonggungan minonimban uhu agayo id pinsingumbalan di koporuol ginawo om asansagan popokiro susuyan oudut,” ka di Joniston.
Komoyon disio totondos dilo’ sabaagi laang do pembangkang miampai tuduan pointirung montok mongimbulai pioduhan id nayatan parti komponen GRS.
“Miampai poingukab do bohogian agatantu’, id pototohuri diti, katalib do sapad montok popintayad haal di amu’ otopot, totondos aiso’ poimpahan, om totondos kumaa GRS om koporintaan buruanon GRS-PH Plus,” ka disio kawagu.
Boyoon Montiri, Datuk Seri Haji Hajiji Haji Noor i po nogi’ Ponorikohon GRS, pinapaharo pinirubaan pointatap miampai momumuruan parti komponen piomungan dilo’, i roitan di Joniston sabaagi kointalangan piromutan osuau diolo’.
“Nosili haal noubasanan montok parti montok popoilo kororohian montok tumanding bobos ginumu’ tindikohon, i tohuri nopo nga’ haal i kiguno pogibabarasan om potontuon soira’ orikot timpu dau,” ka kawagu di Joniston i po nogi’ Luguan Kopointalangan PBS.
“Kiguno nogi’ do onuan kopomodulianan do papatantu’ kalantaion agayo montok GRS nopo nga’ wookon tuduan kopio memorandum pihunungan i pinikogos do PBS om STAR.
“Tingkananon dahai nopo nga’ montok papatahak kotorinaan om koburuon di osonong montok mogigiyon Sabah, om amu’ yahai oinggahan di totondos aiso’ posunduran diti,” ka disio pinoposotol.
Joniston minokianu mononokodung om tulun ginumuan do amu’ momoduli’ kointalangan di sala’ om t umilombus monokodung piomungan GRS tu’ minggisom ilo’ popoudong koponsolon om angkab mogigiyon Sabah.
