Bobbey Suan
KOTA KINABALU: Momumutanom parai tidong id koiyonon poonsokid Sabah kiguno poiduon mantad nunu-nunu laang id siriba’ Rang Undang-Undang (RUU) Kualiti Alam Sekeliling (Ponimbanan) 2023, ka di Senator Datuk Bobbey Suan.
Ka disio, id Bajet 2024, soginumu’ RM50 riong pinoobi’ sabaagi subsidi montok monginggayo po do pananaman parai tidong kiginayo 43,000 hektar kosuul no id koiyonon poonsokid om sarayo Sabah om Sarawak miagal do Pensiangan om Tenom, Sabah.
Minoboros isio, karalano’ pananaman kinoubasanan dilo’ momoguno koponutudan koiyonon om popoindalan no yolo’ do kaparagatan pomutanaman id tukuran di okoro’ om okon ko’ komersil.
Ka disio, pananaman parai tidong winonsoi pointonod di komolohingan tinaru Murut id koiyonon poonsokid kosuul no id tisan nulu toi tisan baang do miundaliu-daliu i kapanahak korungodon sitok parai om takanon kumaa paganakan solinaid iso’ gisom duo toun.
“Mongontok danda’ kumaa kabun ngaawi’ miampai ginayo hinotusan noribu ekar i kaanu kountungan riniongan ringgit poinpatut kopio, nga’ amu’ apatut montok mogigiyon i mongukab no do kabun soikar toi duo montok nopo kosukupan paganakan.
“Kiguno tokou monidsorou monorisid ponimbanan rang undang-undang diti. Kopoiduan mositi’ no do patahakon kumaa tongo’ momumutanom parai tidong id Akta diti,” ka disio ontok minongomi RUU dilo’ id Dewan Negara, Kuala Lumpur di tadau Kotolu katatalib.\
Bobby minoboros, Ponimbanan RUU dilo’ kituduan montok papagaras tonggungan Koupisan Sandad Posorili’ miampai popogirot kuasa’ Akta Kualiti Alam Sekeliling 1074 do papaharo danda di lobi kogumu’ montok manalob om mongukum momumusala’ sandad posorili’, suai ko’ manahak kopokitanan atalang do koporintaan pointootopot do manamong kopomoyomutan sandad posorili’.
“Aiso’ doho’ do kobolingkahangan di karalano’ toi kapapanahai tokou montok manalob om mongukum momumusala’ sandad posorili’, miampai popoingkawas ukuman om danda’ gisom riniongan ringgit toi nunu nopo karaaralano’.
“Mantad haro RUU dilo’, timpu dumontol koinsanai sunduk kopoburuan montok ababayan mongingkawas ikonomi poinhompit do sandad posorili’ onuan kopomodulianan di bohogian poinggompit,” ka disio.
I Bobby poingkuro po pinoposotol, haro kogunaan montok monorisid RUU dilo’ nung momumusala’ nopo nga’ “repeat offenders” om kiguno adangon montok poposuang klausa di lobi kokodou kohondot momumusala’ dilo’ montok mongilag om sabaagi panalob kasalaan di miguuguli’.
Kalansanan disio miampai papatantu’ ukuman jiil mandatori kopongilag kaantakan kes ngaawi’ kopomoyomutan toi momumusala’ sandad posorili’ do timpu dumontol.
Suai ko’ papagaras RUU dilo’ mooi do lobi poinpuli, kalansanan po nogi’ disio koporintaan momoruhang kopoobian montok kotinanan pogirotkuasa’ sandad posorili’ do mongingkawas po di ababayan pintoririningan sitaf, kakamot om kogorison tiknologi.
Pinokianu nogi’ disio koporintaan popointalang nung RUU Kualiti Alam Sekeliling (Ponimbanan) 2023 oguno nogi’ kohondot momumusala’ pomorunan mantad pogun sombol kosuul no boogian i koowit do kaantakan kobolingkahangan lisun posoborong piwolitan i otoguang pomogunon diti.
“Kiatag toi koporintaan montok monilombus Akta Jerebu Rentas Sempadan i hinombo do sombol tokou Singapura nokopolulus no dilo’ pointonod di 2014 po suai ko’ monuridong palan koundangan di oirad miampai koinsanai pomogunon Asia Tenggara lolobi no Indonesia?”
Bobby pinoposotol, koporintaan kiguno monimbang kopoopuan id koposodiaan kogogonopan kopisudong montok kapataaman babarang kitimpu, suai ko’ ponimbanan undang-undang, montok mongingkawas kopurimanan om ponontudukan ginumuan karait koponsolon manamong sandad posorili’ om waya’ araat do kopomoyomutan.
“Iti kaampai no tongo’ ababayan ponontudukan om kimpin ngaawi’ kopurimanan montok papatantu’ mogigiyon karati di tonggungan diolo’ kumaa sandad posorili’ om waya’ koponohuban undang-undang,” ka disio.
